E presentadornan di Career IQ, Darice Solognier y Kareline Van Der Linden, tin un pasion pa crecemento y desaroyo personal. Nan tabata convenci cu tin hopi informacion of tip, cu nan por siña di nos hendenan riba e area di carera y desaroyo personal. Asina e idea a nace, pa haci esaki den un forma di Radio/Podcast show via radio Hits 100. FM y podcast.
KARELINE VAN DER LINDEN
Despues cu Kareline Van Der Linden a termina su VWO, el a bay studia na UNA (University of Curacao) Business Administration. Kareline a sigui studia y a bay Hulanda, unda el a haci 2 Masters: Strategic Management y Research Master den strategy & organization na Tilburg University. Ora el a regresa Aruba, Kareline a ripara cu tabatin un “disconnect” grandi di loke el siña na scol of loke bo ta spera y e mundo practico. E ora su interes pa desaroyo y crecemento personal a nace y a cuminsa haci diferente analisis, pa comprende kico ta pasando. Despues di a amplia su conocemento, Kareline tabata kier a comparti esaki cu mas hende. Como un Rotaractor hunto cu e club na 2015, nan a lanta You Inc seminar, pa asina educa mas y mas hoben riba ‘soft skills’. Actualmente Kareline ta trahando na Aruba Tourism Authority como e ‘Research Specialist’, cu e rol pa haci diferente analisis y estudio riba nos mercadonan di turismo y na mesun momento riba e impacto cu turismo tin na Aruba.
DARICE SOLOGNIER
Despues cu Darice a termina su estudio den Hospitalidad & Turismo na Aruba mes, el a cuminsa labora den e sector di hospitalidad y turismo na AHATA, den e ramo di reunion y evento. Despues di esaki Darice a haya e oportunidad pa join Aruba Tourism Authority y sigui traha den e mesun ramo, cual ta forma parti di mercadeo. Na Aruba Tourism Authority Darice a haya e oportunidad pa sigui crece y durante su ocho añanan laborando na ATA, el a eherce tres funcion den e area di mercadeo. Actualmente Darice ta eherciendo e funcion di Niche Marketing Specialist, cual ta traha riba un nivel strategico pa desaroya e mercadonan “Niche” di Aruba, manera entre otro e mercado di bruid y romance, promove nos cultura culinario, yuda pa desaroya y promove e mercado di salud y bienestar.
“Mi ta kere hopi den constantemente keda desaroya bo mes, mediante tur herment cu nos tin na nos disponiblidad. Desde hoben mi tin e espirito di entrepreneur y di mucha te cu awo, mi tabatin varios negoshi chikito band’i estudio y trabou. Y esey ta algo, cu mi ta disfruta hopi di dje.”
Lesa e entrevista extenso y cu un contenido interesante di Kareline y Darice den edicion di FOCUS di e luna di juni!
