Endy Croes ta sintie feliz, contento, satisfecho, agradecido y hopi orguyoso di Ileyna de Cuba, cu su logra como Miss Teen Aruba International 2019. Y tambe tur hende cu a traha duro den Ileyna su preparacion pa su logro ayeranochi. E corona ta un corona cu Ileyna y e team a traha duro p’e, cu hopi dedicacion y determinacion. Despues di Chysah Verstappen cu a sali Miss Teen Aruba International 2013 y Miss Teen Americas 2014, semper e reinanan di Endy a sali den top 3, pero e aña aki e titulo a bin bek pa N-Designz.
Ileyna a carga e corona tanto di Reina Infantil como Reina Hubenil, cu ta dos titulo maximo den celebracion di nos carnaval. Segun su preparador door di su experiencia den eleccion di reina, Ileyna conoce escenario y ta briya mas ora e ta riba escenario. Aunke e preparacion pa miss ta ful diferente cu ora di bay pa reina di Carnaval, toch e ta kere e feeling riba stage ta keda mescos, y Ileyna sa di probecha di esaki. Segun Endy, e ta kere cu e siguransa cu Ileyna tabata refleha riba escenario, ta loke a hacie sobresali. E tabata sa precies kico el a bay haci riba escenario y esey el a haci cu tur siguridad den su mes.
Potret: Cortesia Nilton Lacle
Riba e pregunta na Endy ki ta su opinion di e certamen cu 3 candidata, el a bisa: “Mi ta consciente cu bay pa reina tin su gastonan y no tur ora bo tin e suerte di haya reina cu tin ful e sosten y apoyo (financiero) di su mayornan y/of famia. Vooral mayornan cu tin mas cu 1 yiu, hopi biaha no ta prepara pa e gastonan cu tin den un certamen, si bo kier bay di e mihor forma prepara posibel. Aruba ta keda un isla chikito unda cu lamentablemente e cultura di “Miss” manera na Venezuela por ehempel, no ta existi. Tin 3 certamen di e mesun categoria di edad na Aruba, y e ta keda bira mas dificil pa tur 3 certamen haya hopi candidata pa participa manera antes. Pero sea cu ta 3 candidata of 10, e preparacion pa e reina cu ta representa N-Designz den cualkier di e certamennan ta keda mesun intensivo y extenso”.
Den Endy su opinion cu e anochi final di Miss Teen Aruba International a bay hopi bon coordina y GLW Foundation a haci un bon trabou pa pone un show fantastico pa e publico, aunke cu ta 3 candidata so nan tabata. E ta felicita GLW Foundation pa un biaha mas a percura pa un temporada hopi educativo pa e 3 reinanan. Awo e preparacion ta sigui pa e certamennan internacional cu cada un di nan lo tin e oportunidad pa bay competi na dje.
Team N-Desingz cu Ileyna den su participacion na Miss Teen Aruba International 2019 a gana 10 premio:
Miss Teen Best Smile
Miss Teen Fotogenica
Miss Teen Spirit
Miss Teen Folklore
Miss Teen Press
Miss Teen Ella’s Accessories
Best Hairdo (Di 2 aña sigui cu Endy ta gana e titulo aki)
Best Makeup (Di 3 aña cu Endy ta gana e titulo aki)
Best Gala Dress (Di 4 aña sigui cu Endy ta gana e titulo aki)
Miss Teen Aruba International 2019
