E encantadora y exotico beyesa di Aruba, Nurianne Helder, a ser invita pa un ‘reunion’ organisa pa Miss World Barbados 2018, Ashley Lashley, hunto cu otro candidatanan mas cu a participa na e certamen di Miss World 2018. E ‘reunion’ a ser planea rond di e temporada di ‘Crop Over’, cu ta nan propio celebracion di carnaval. E candidatanan di Miss World di aña pasa cu tabata presente, a participa durante ‘Grand Kadooment’ cu den otro palabra ta Parada Grandi di Barbados.
Ademas di e celebracion di ‘Crop Over’ tabatin diferente actividad manera ‘Global Network Conference on Sustainable Development Goals’. Durante e evento aki tur Miss World a presenta nan proyecto di beyesa cu proposito en conexion cu SDG’s. Mas presentacion a ser duna door di diferente studiante di American University di Barbados. Fuera di e conferencia tur e missnan a participa den diferente actividad turistico pa asina conoce Barbados. Tabatin tambe un ‘auction night’ pa recauda fondo pa e causa di conscientisacion pa ‘Non Communicable Diseases’, bishita na ‘childrens home’,’ get up and move summer camp’ y photo shoot.
Nurianne ta sumamente agradecido specialmente cu Miss World Barbados 2018, Ashley Lashley, cu a logra organisa un ‘reunion’ exitoso cu a uni nan como ruman mas ainda. E missnan cu tabata presente tabata di Trinidad and Tobago, Curacao, Guyana, Cayman Islands y El Salvador. Miss World Aruba ta hopi agradecido cu e cariño cu Barbados a brinda nan y pa e hospitalidad increibel. El a disfruta di cada momento na Barbados y e ta pensa cu pronto di haci un otro bishita.
Alabes Nurianne ta desea e reinanan cu lo ser corona mayan tur exito di mundo. Cu e ta desea cu e experiencia trece hopi momento involvidabel den nan bida manera el a pasa aden!
