Den revista FOCUS pa e luna di augustus por lesa un entrevista extenso cu Pedro Vargas, cu ta e Gerente General di Marriott Aruba Ocean Club. E ta conta su storia desde cu el a yega Aruba como un studiante y ki tabata su prome impacto. Cu e no tabata facil pa enfrenta un mundo diferente na un edad hoben leu di su famia. Sinembargo cu su deseo pa siña y cu e meta fiho, cu e kier progresa den bida, a haci cu el a sa di probecha tur oportunidad cu Aruba a ofrece. Pedro ta conta con el a logra siña Ingles y Papiamento den un epoca cu no tabata existi internet ni telefoon celular.
Aunke e tabatin su titulo di “Administracion Hotelera” obteni na Centro Nacional de Hoteleria na Colombia, e tabata atende e cursonan na Enseñansa pa Empleo. E no tabatin un linea recto y e mester a cambia di diferente trabou, pero esey a genera un experiencia, cu si pone hunto awendia den su curiculo, e tin experiencia den diferente area den hoteleria. Den mesun hotel complex, unda e tabata carga maleta 20 aña pasa, awendia e ta e gerente general. Lesa mas di Pedro Vargas su entrevista den revista FOCUS y di e puntonan cu e ta considera importante pa sigui mantene nos turismo. Di su pensamento riba e problema di ‘over development’ cu demasiado construccion, sobrepoblacion, seguridad y si un lugar turistico converti den un producto mucho caro.
