Miss Universe Aruba 2019, Danna Garcia, actualmente ta studiando enfermeria y na mes momento e ta traha tambe na Dr. Horacio E. Oduber Hospital. E gusta bay gym, lama, canta y lesa buki di superacion personal of bukinan motivacional. Na e momentonan aki e ta bibando cu su mama y un tanta, y di nan el a siña pa ta un persona trahado y humilde. Nan a siñe cu si bo kier yega leu den bida, bo mester traha duro y ta dispuesto pa haci tur locual otro persona no ta dispuesto pa haci. Den bida tur trabou cu bo ta haci cu humildad, honor y forsa ta hiba bo padilanti.

Danna ta sintie hopi contento y agradecido cu tur hende cu a yude den e trayecto pa su logro como Miss Universe Aruba 2019. Na mes momento e ta hopi ‘excited’ pa sigui traha riba su preparacion internacional, pa asina haci un bon trabou na e certamen di Miss Universe representando Aruba. Danna cu 15 aña a cuminsa como modelo di KOMA y cu 16 aña el a conkista e corona di Miss Teen Aruba International 2016. E certamen aki a permitie siña asina hopi y na mes momento el a crece como persona. E ‘feeling’ ey sigur a pone cu e tabata kier a ‘challenge’ su mes atrobe! E no tabata sa cu e lo ta e aña aki, pero na momento cu el a ser aserca pa e organisacion di Star Promotion, el a acepta e oportunidad y a bay pe!

Danna tabatin e honor di representa Aruba na El Salvador, unda el a gana e titulo di Virreina de Las Americas. E experiencia aki tabata unico y el a conoce hopi hende y siña hopi di e otro cultura- y caracternan. Te ainda e tin contacto cu e candidatanan cu a representa e otro paisnan. Su preparacion tempo cu el a competi pa Miss Teen Internacional tabata uno hopi streng. El a inclui come saludabel, vestuario y su lesnan personal. Su team e tempo ey tabata MIRRORS by Edgar Kock. Pa e eleccion di Miss Aruba awor esey tabata ful den man di e preparadornan di Star Promotion. Riba e pregunta ki Miss Aruba Universe tin como un deseo cu e ta desea di wordo cumpli, el a contesta: “Semper mi tin mi metanan pa cumpli durante un aña. Mi ta skirbi nan riba un papel y mi ta traha pa asina mi por logra nan. E deseo cu mi kier mira cumpli ta pa representa Aruba super bon den exterior, y si Dios duna mi e oportunidad mi lo kier clasifica of bin cu e corona universal, pa asina mi gradici Aruba pa tur loke el a haci pa mi y mi famia”.

LEAVE A REPLY

Please enter your comment!
Please enter your name here