Riba e prome dia pa e aña escolar nobo tabata sigur extra special pa e muchanan y maestranan di Anglo Kleuterschool na Madiki. Nan ta inicia e aña den un ambiente diferente cu un scol bunita, y manera e cabesante di e scol, Juffrouw Marieta Croes-Geerman, a enfatisa den su discurso, cu un ‘magia’ a pasa durante e temporada di vakantie. Cu awor e scol ta mescos cu nobo, cu colornan bunita tanto na e murayanan como tambe e coy hunganan, zandbak, gymzaal y e nomber den un arte nobo. El a pasa despues di a splica e parti di e embeyesimento di e scol, pa e palabra di gradicimento na Kiwanis Club of Aruba, cu a realisa e trabou aki durante varios dia, unda tambe e maestronan di e scol a yuda pa logra e bunita facelift na Anglo Kleuterschool.
Despues a dirigi algun palabra di parti di Kiwanis Club of Aruba, su presidente Edalitza Weller y tambe Robert Spellen cu ta Governor Designate pa Eastern Canada & Caribbean District. Den ambos discurso nan a elabora den palabranan simpel pa e muchanan compronde, e importancia di un bon comportacion y educacion pa nan futuro di mayan. Como un acto simbolico pa fortifica e palabranan dedica na e muchanan, a scoge for di cada klas 1 mucha pa planta un mata cual nan lo mester cuida y duna awa pa e crece bira grandi. E celebracion a sigui cu cantamento y baile pa despues e muchanan haya un treat sirbi pa e miembronan di Kiwanis Club of Aruba presente durante e mainta aki. Esaki sigur ta un inmenso satisfaccion pa por a realisa un proyecto asina bunita pa e 168 muchanan di Anglo Kleuterschool, cu ta hopi contento cu un scol bunita geverf y dorna cu matnanan pa duna un inicio memorabel na e aña escolar nobo.
