Un anochi glamuroso den estilo red carpet, cu un desfile di invitado VIP bisti trendy den e tononan cora y preto, a asisti na e invitacion di Penha Aruba, unda a lansa e fragancianan nobo di Armani. Famoso pa su diseñonan, e diseñador Italiano tin un portfolio amplio di fragancia, cu ta dedica na e personanan moderno y sofistica.
E evento tabata den e concepto di ‘red carpet movie night’, unda por a descubri cua fragancia ta pas cu bo personalidad, a base di e pelicula cu bo ta gusta. Sea bo ta amante di pelicula di pasion, romance of aventura, e conseheronan specialisa di Penha, a yuda scoge e fragancia depende di e pelicula cu cada persona ta encanta. Den Penha tin un area di fragancia hopi bunita di Armani, cu tin fragancia pa tur tipo di persona y gusto.
Un primicia durante e evento aki tabata cu e invitadonan por a retouch nan lipnan cu e lipstick di Armani, aunke ainda e no ta na benta na Aruba. Kiermen tur hende a ricibi un ‘Armani experience’ completo cu e atencion personal di e ‘beauty advisors’ durante henter e anochi. Penha Aruba a realisa otro evento exitoso, unda tur presente a disfruta di bon biña, bubbly, canapes y cu un vip booth special di Grey Goose, cu un cocktail crea exclusivamente pa e evento di Armani.
Nan a haci relansamento di ‘Acqua di Gioia’ , cu ta un fragancia hopi fresco y masculino, cu te ainda ta e number uno mundialmente den e fragancianan di hende homber. Pa hende muher tin ‘Si Passione’ cu ta un exito, cu a lansa aña pasa. E ta un fragancia hopi mas zoet, cu un toke mas ‘powdery’, cu no ta hacie asina intenso. Pa zomer algo mas fresco ta e ‘Acqua di Gioia” di hende muhe y e fragancia nobo ‘Sky di Gioia’ cu tin e notanan super fresco special, cu pa Aruba e ta un combinacion perfecto, principalmente den dia cu bo kier algo mas fresco cu e notanan frutal.
