For di dia 30 di october te cu dia 3 di november 2019 Aruba lo ta e epicentro di e di dos ‘Island Takeover Festival’. Despues di un prome edicion sumamente exitoso, e aña aki e festival lo ta uno mas amplio cu hopi actividad ademas di concierto.
Durante un conferencia di prensa e organisadornan, Elite Empire Entertainment, a confirma presentacionnan di e artistanan manera: UB40 di Inglatera, Sech di Panama, Lunay di Puerto Rico, Alex Sensation di New York/Miami y Jeon di Aruba.
E organisadornan a confirma tambe cu lo anuncia mas nombernan den e siguiente simannan. Ampliando e actividadnan rond di e concierto e aña aki, lo tin un evento culinario, conferencia di tecnologia (A-Tech), exposicion di arte, ‘block party’ y experiencianan unico dedica na e turistanan cu lo biaha specialmente pa e evento aki.
E concierto mes lo ta memey di e 5 dianan di evento, cual ta Diabierna dia 1 di november 2019. E concierto lo tuma lugar na Harbor Arena y lo tin diferente seccion. Lo tin e seccion general, vip standing cu ta dilanti e scenario y tambe seccion di mesa riba e conocido VIP deck. Carchinan lo ta obtenibel online via www.islandtakeover.com pero tambe na Citgo Boulevard, Citgo Palm Beach, Citgo Essoville y Superfood. Mas despues e Pop Up Store manera aña pasa tambe lo cuminsa opera.
Aruba Tourism Authority ta un di e patronisadornan principal di e evento aki y mirando e resultadonan di aña pasa ta mira e potencial pa e festival por sigi crece. Mas di 500 bishitante internacional a biaha pa Aruba aña pasa y ta spera cu e aña aki esaki lo surpasa e cantidad anterior. Tabatin biaheronan for di Merca, Colombia, Curacao y otro paisnan den nos region. Specialmente pa e biaheronan Island TakeOver a prepara un iterinario cu hopi actividadnan culinario pero tambe explorativo pa asina na conoce nos isla mihor.
Pa loke ta e evento principal UB40 lo ta na Aruba despues di 25 aña. Como un di e bandanan cu a atrae mas hopi hende den un concierto na Aruba, hopi ta e fanaticonan cu ta hopi contento cu e hecho aki.
Pa mas informacion por bishita www.islandtakeover.com of https://www.facebook.com/islandtakeover/ Pa mas informacion [email protected]
