Fitville 2019 ta e di tres edicion di un competencia di CrossFit den cual atletanan den diferente categoria ta competi contra otro, e aña aki den ekiponan di 2 persona. E evento aki ta creciendo cada aña cu mas atleta local y internacional. Na 2018 tabatin un total 90 atleta (45 team) for di cual 12 atleta tabata di exterior. Fitville 2019 ta contando riba 170 atleta for di cual casi un 80 atleta di paisnan manera Hulanda, Merca, Suecia, Corsou, Venezuela, Colombia, Surinam y British Virgin Islands.
Fitville 2019 a inicia ayera y ta sigui awe y mayan diadoming, unda lo tin por lo menos 80 voluntario riba pia pa haci e evento un realidad. E aña aki e actividad ta tuma lugar na Centro Deportivo Betico Croes. Awe diasabra el a inicia for di 12or di merdia y ta sigui te cu 8or di anochi y mayan for di 12or di merdia te cu 6or di atardi. E evento lo termina cu un after party na Local Store Aruba, na unda lo tin e otorgamento di premio y un live band pa celebra e clausura di Fitville 2019. Parti mainta awe y mayan lo tin evento na otro localidad manera Bushiribana (trail run), Rennaisance Marketplace y Eagle Beach mayan for di 7or pa 10or di mainta. Pa mas informacion por tira un bista riba e ‘event schedule’ riba e website www.fitvillearuba.com Un suma chikito di awg 5.00 ta wordo cobra pa full e weekend.
