Yrausquin, dealer di auto y compania di famia pa mas cu 66 aña na Aruba, ta orguyoso di ta e patrocinador principal di e premio mayor di e rifa organisa door di e Mustang Sport Boys, e Ford Figo sedan 2019. Sander Leijenaar, presidente di Mustang Sport Boys Club a aserca Ruben Yrausquin, director general di Yrausquin, pa yuda contribui y hunto a logra di ofrece e Ford Figo nobo como e premio mayor.
Mustang Sport Boys lo organisa un Car Show riba diasabra 26 di October for di 7 or di anochi te cu 12 or di marduga na Linear Park unda lo saca e ganadornan. Lo tin musica en bibo di Rincon Boysz, Tsunami, Buleria, Jeon, Vibes y NutzBeatz.
TIN SEIS PREMIO:
- Un Ford Figo 2019 nobo
- Round trip flight na Miami pa dos persona
- Weekend stay na Marriott Aruba Surf Club
- Weekend stay na Hilton Aruba Caribbean Resort & Casino
- Un Smart TV 58”
- Certificado di regalo na balor di 750 florin di Superfood. E ganadornan lo wordo saca durante e Carshow dia 26 di october den presencia di notaris Yarzagaray pa 11or di anochi.
“Como un compañía di famia, un di nos balornan fundamental ta famia. Nos ta kere firmemente cu tur mucha merece pa lanta den un ambiente stabiel y ricibi apoyo positivo den nan criansa y educacion. Pesey nos ta sumamente orguyoso di ta patrocinador principal di e rifa pa recauda fondo pa Casa Cuna”, Christina Yrausquin, gerente di benta di Yrausquin, a expresa.
E ta costa solamente 10 florin pa ticket y e buki di rifa lo ta disponibel na Yrausquin y Casa Cuna pa esunnan interesa. Tambe por aserca e miembronan di Mustang Sport Boys Club. Por haci donacion tambe via Aruba Bank Account# 6000090290 di Mustang Sport Boys pa aporta na e causa di Casa Cuna.
Durante e ultimo tres weekend di october e miembornan di Mustang Sport Boys lo ta na Linear Park entre 4or di atardi te cu 7or di anochi pa bende rifa. Pa mas informacion por subi riba e Facebook page: https://www.facebook.com/mustangsportboysaruba/.
