Un anochi special organisa pa Veuve Clicquot y Aruba Trading Company, unda a invita 50 hende muher pa un ‘private tasting’ na Papiamento Restaurant. E Brand Ambassador, Nathan Benfrech, a habri e anochi cu un presentacion contando riba e historia di e famoso Veuve Clicquot Champagne. E damanan presente for di diferente gremio di Aruba, sigur a disfruta di un evento exkisito y ademas a contribui pa un bon causa. E invitacion tabatin un contribucion pa asisti y esaki a keda entrega como un donacion na Fundacion Respeta Mi.
E suma recauda tabata AWG 3,100.00, cu a ser entrega na Celine Oduber for di man di Melissa Geerman, MoëtHennesey Portfolio Manager, y Nathan Benfrech. Den un discurso cortico dilanti di e grupo di hende muher, Celine a bisa con importante e ta pa cada persona por informa y educa e muchanan. Cu ignorancia hopi biaha ta wordo uza contra e muchanan y hopi biaha kier silencia e muchanan pa no papia di e abuso cu nan mester a soporta. Cu nan tin e derecho di biba liber di abuso y abuso sexual, y como hende muher nos tambe tin e responsabilidad pa educa nos mes, cual ta haci posibel pa por educa nos yiunan riba nan derechonan.
