Nobenta muhe di tur parti di mundo, a bini hunto na Atlanta, Georgia, pa e di 68 edicion di e competencia di beyesa di mas grandi; Miss Universo. E anochi yena di beyesa aki a sosode na Tyler Perry Studios y mas cu claro tabatin Algun highlight cu a causa un impacto y sensacion mundial den e certamen di Miss Universe 2019 y Revista FOCUS ta trece esaki pa su lectornan tambe. Manera e otro añanan, Steve Harvey a conduci e concurso y afortunadamente, e presentado a anuncia e ganadora di anochi sin ningun eror y nos por a celebra Zozibini Tunzi di Sur Africa, su coronacion, como Miss Universo 2019, 1st Runner-up: Maddison Anderson di Puerto Rico y 2nd Runner-up: Sofia Aragón di Mexico.
E cantante, Ally Brooke, a haci e apertura di e gran evento, unda el a interpreta Low-Key y su single nobo No Good. Pero loke a sorprende y pone e publico yora, ta ora el a canta dos di e canticanan mas iconico di Selena Quintanilla: I could fall in love y Dreaming of you, durante e pasarela di bisti di anochi.
Durante e presentacion di trahe tipico, e candidata di Brasil a sorprende e comision di seleccion, den e tononan di oro, bou keds cu mea largo blanco y cu un paña blanco den su mannan cu e slogan den preto y cora: STOP VIOLENCE AGAINST WOMEN. Miss Brasil, Júlia Horta, a probecha e momento importante y mundialmente televisa aki, pa manda un mensahe contundente na fabor di e lucha femeninsta.
Un eror cometi atrobe pa Steve Harvey, pero no cu e magnitud di e eror cometi na 2015, ora cu el a duna e nomber ekiboca di e ganadora absoluto di Miss Universo. E biaha aki Steve a bisa durante e transmision, cu ta Miss Filipinas a gana e Concurso Nacional di Trahe Tipico, pero di biaha e Miss Malaysia, Shweta Sekhon, a coregie, bisando cu no ta Filipina, sino Malaysia. Harvey a bisa cu no ta su fout, pero cu e ta djis lesando for di e teleprompter y ta eynan e fout ta y no di dje. Y na final el a bisa cu su jacket berde cu e aplicacionnan den oro ta hopi yamativo y elegante y ta match cu e trahe di Miss Malaysia.
E virreina, Madison Anderson, Miss Puerto Rico, a obtene e titulo di 1st Runner-up, lo mester sustitui Tunzi den caso cu e por sigui cu su responsabilidadnan como reina. “Ta riba e escenario di Miss Universo no ta djis un soño. E ta kere cu el a haya su mision. Ta un representacion di dedicacion, resistencia y perseverancia. Mi ta kere cu mi mision ta mustra mundo cu e magia ta pasa ora nos nenga di rendi, paso e universo semper ta scucha un curason terco”.
Sofia Aragón, Miss Mexico, cu a keda como 2nd Runner-Up, a deslumbra cu un espectacular bisti cora yena di piedra, cu a laga tur hende boca habri. Sin duda su contestanan tabata profundo y a sa di duna e twist ‘on point’ pa loke ta trata certamen di beyesa, demostrando su gran capacidad intelectual combina cu un beyesa unico. “Si bo no uza bo beyesa pa e mision di bo bida, e ta solamente un adorno bashi.”
Miss Universo 2019, Catriona Gray, a bisa cu a pesar, cu algun Miss a cay, nan tabata sa di lanta bek y esey ta loke ta conta. El a indica cu e ta admira nan pa tur loke nan ta pasa aden y cu e topico semper back stage, ta e miedo pa cay durante presentacion. Miss Francia, Maeva Coucke, a slip cay abou, durante e presentacion di badpak , pero na un forma graciosamente el a lanta para bek, manera cu nada a pasa.. Y despues Miss Malaysia, Shweta Sekhon, tambe a ‘hit the floor’, pero a sa di lanta para mesora tambe y mandando sunchi pa e publico. Y finalmente Miss Universo 2019 a agradici e publico, cu a apoya e candidatanan na un forma hopi humano.
Pa prome biaha e concurso di beyesa Miss Universo a presenta un concursante abiertamente gay y e ta procedente di un pais, unda cu ta criminalisa homosexualidad. Swe Zin Htet, di 20 aña, a competi como Miss Myanmar y aunke e no a logra avansa den e top 20, e fanaticonan a bisa, cu ya el a haci historia pa presenta e comunidad LGBTQ den un escenario global. “Mi kier pa mundo acepta e comunidad LGBTQ+ y su derecho pa elegi nan propio caminda y e buskeda di felicidad”, ta loke el bisa. “Semper nos mester tin e libertad di eleccion y promove igualdad”. El a publica un collage di potret riba Instagram, unda el a pone un bandera di arco iris y e palabra “Orguyo”. Su revelacion ta mas sorprendente ainda, ya cu un seccion di e era colonial di codigo penal di Myanmar, ta permiti tribunal pa castiga e sexo gay cu pena largo di prison. Aunke no ta aplica e ley ampliamente, e personanan LGBTQ na Myanmar ainda ta enfrenta un mayor frecuencia di aresto y esunnan cu no kier ahusta na e ideanan tradicional di genero, hopi biaha ta haya rechaso.
Miss Canada, Alyssa Boston, a causa polemica cu su trahe tipico di blachi di marihuana, ya cu e ta defendiendo e consumo di marihuana medicinal den pleno certamen. Durante pasarela Alyssa Boston a cana dilanti e audiencia pa crea consciencia tocante marihuana pa consumo medicinal y den un entrevista el a señala cu e no ta consumi cannabis, pero cu si e ta na fabor di su consumo, si esaki ta yuda e enfermonan di cancer. Miss Canada a enfatisa cu e punto mas importante “ta pa tin un hende cu no ta den e industria, papiando di esaki y realmente por habri e wowonan di un grupo di persona completamente diferente”.
Skirbi: Sue-Ann Ras
