Sali core bay pafo cu maleta, ta atrae biahe, uza panti cora pa amor, enfin tin diferente opcion di ritual pa ricibi e Aña Nobo y despidi di esun bieu. Algun persona ta kere den nan y ta hacie y tin otro, cu ta opta pa keda sceptico. Berdad ta, cu e energia ta existi y tin dia cu e ta carga, manera 31 di december, fin di un ciclo y inicio di un decada nobo, cu cerca e Chinesnan ta conoci como Aña di Djaca.
Aña di Djaca, oportunidad nobo, amor y prosperidad…2020 ta bay ta uno exitoso! Segun zodiaco Chines, e aña di Djaca ta e prome signo di e 12 animalnan di ciclo di Zodiaco Chines y p’e motibo aki, e periodo ta considera un aña di e cuminsamentonan nobo y e renobacionnan. Tur hende mester demostra determinacion relaciona cu nan meta-, aspiracion- y hasta nan hobbynan. Esaki ta un tremendo aña pa descubri y evoluciona.
Pa esunnan cu si ta kere den e energia, aki tin 3 opcion di hechizo di amor pa 2020.
Pa atrae e amor
Si bo kier atrae e amor den 2020, percura pa 31 di december bo busca un papel blanco, un pen cora, un quartz blanco y un bela ros. Riba 31 di december atardi bay den bo camber (segura cu niun hende ta molestia bo) y cu e pen cora haci un lista di loke bo kier haya den bo proximo pareha. Despues ripiti den bos halto: ‘Ami (bo nomber) merece un homber bon y mi ta pidi un persona pa compaña mi den e bida aki cu e siguiente caracteristicanan: ‘(lesa loke bo a skirbi riba e blachi).
Marduga, net algun minuut prome cu e kloknan zona, pone e papel cu e quartz na un lugar cu nan por ricibi e rayonan lunar. Despues di mey anochi, coy e papel y e quartz y kima nan cu e bela ros. Warda e quartz, pasobra esey ta bay ta bo amuleto di bon suerte pa e amor durante e aña.
2. Pa aleha un persona di bo relacion
Tin un persona cu no ta laga abo of bo pareha na paz? Freeze e! Si bo kier aleha un persona indeseabel, percura pa riba 31 di december bo skirbi riba un papel su nomber completo y den un luga cu bo ta bo so, bisa den bos halto: ‘Ami (bo nomber) ta ordena pa bo laga mi na paz. Mi no ta desea bo malo, pero di awo en adelante bo energia negativo no tin poder riba mi relacion mas y bo no por molestia nos mas. Asina lo ta’. Despues, parti un lamunchi den mitar y hinca e nomber di e persona memey. Finalmente pone e lamunchi den freezer.
3. Pa lubida un amor bieu
Ta dificil pa laga un amor antiguo bay? E fin di aña aki ta e oportunidad perfecto pa cera e ciclo cu ne y habri un decada nobo, unda cu e magia por yuda bo. Bo mester di un blas di helium, un pida di cabuya cora, un papel biña, un pen ros, un potret di boso dos y un bela blanco. Durante e atardi/anochi di 31 di december, skirbi cu e pen ros riba e papel biña, e motibonan cu bo kier laga e amor aki bay. Posteriormente mara e na e blaas di helium cu e cabuya cora y na dje, e potret di boso dos. (of esun di dje den su defecto).
Durante e anochi, ora cu e kloknan bati mey anochi, bay pafo y laga e blaas cu e potret mara na dje bay. Despues kima cu e bela blanco e papel biña, bisando den bos halto: ‘Ami (bo nomber), ta laga bo liber. Ya bo no lo causa mi mas dolor, ni ami lo haci na abo. Ta feliz sin mi, manera cu ami lo ta sin bo. Asina lo ta.’ Laga e biento bay cu e shinishinan.
