E mayoria di hende ta spaar y ta gasta un suma chikito riba dia di nan casamento. Pero si bo ta un celebridad of ta bin di rikesa, ta probabel cu e fortuna ta multiplica hopi biaha pa crea un aventura inolvidabel. E por bira ainda mas impecabel, ora bo ta di realesa, y ta scoge e lugar, misa y shimis pa e ‘fairytale wedding’. Esaki ta e personanan cu no tabatin miedo pa gasta algun miyon pa nan boda pa entre otro: venue, bolo, flor, entretenimento y creacionnan di diseñadornan. Y sin laga afor cu algun di e matrimonionan ta termina den un divorcio igualmente costoso. Esakinan ta e Top 10 Bodanan di mas caro cuminsando for di esun mas costoso pa esun cu a costa menos miyones.
#1 PRINS CHARLES & PRINSES DIANA
$110 MIYON
Aunke nan boda a tuma lugar algun decada pasa, niun otro matrimonio ta yega cerca di esun di prins Charles y prinses Diana. Presencia personalmente pa 3.500 persona y transmiti pa 750 miyon di televidente rond mundo, e Boda Real entre prins Charles y prinses Diana na 1981 ta simplemente e boda mas caro di historia. E shimis di Diana tabata cubri cu 10,000 perla y un cola di 25 pia. E pareha real a divorcia na 1996, un aña prome cu Diana a fayece tragicamente den un accidente di auto hunto cu su pareha, e empresario egipcio Dodi Fayed.
#2 VANISHA MITTAL & AMIT BHATIA
$66 MIYON
Vanisha Mittal ta yiu di Lakshmi Mittal, un di e hombernan mas rico di mundo. No tabata un sorpresa cu su boda cu Amit Bhatia tabata un di esnan mas extravagante di historia. E boda a wordo celebra den e historico Chateau Veaux le Vicomte di siglo XVII, cerca di Paris na 2004. E artista Kylie Minogue a ricibi $ 330,000 pa presenta durante mey ora. Despues tabatin un show di fireworks lansa for di Eiffel Tower. E matrimonio no a dura mucho, ya cu e pareha a laga otro na 2013.
#3 PRINCE WILLIAM & KATE MIDDLETON
$34 MIYON
E prome di e bodanan real riba e lista tabata Prins William cu a converti Kate Middleton den su esposa na 2011 den e asina yama: “E boda di Siglo”. Realisa den e manera real cu e futuro Rey y Reina di Inglatera merece den e Abadia di Westminster. Despues e pareha a desfila den e cayanan di Londres den un koets y ta bunita awendia pa mira e pareha hunto cu nan tres yiunan.
#4 WAYNE ROONEY & COLEEN MCLOUGHLIN
$8 MIYON
E futbolista Wayne Rooney di Manchester United y Coleen McLoughlin a casa den e Abadia di Cervara, cerca di Genova, Italia na 2008. Rooney a huur cinco avion priva pa hiba 64 di nan invitadonan na e boda. E pareha a ricibi un suma di $ 4.2 miyon cu un revista a paga nan pa e derechonan exclusivo pa nan potretnan di bruid. Awendia, Wayne y Coleen ta contento cu nan bida como un pareha casa y criando nan 2 yiu hombernan.
#5 CHELSEA CLINTON & MARC MEZVINSKY
$5 MILLION
Si bo ta yiu di ex presidente di Merca y ex secretario di Estado di Merca, ta probabel cu e boda no lo ta nada simpel. Y esaki tabata e caso di Chelsea Clinton, yiu muher di ex presidente Bill Clinton y Hillary Clinton. Chelsea a casa cu e bankero di inversion, Marc Mezvinsky, den un ceremonia esplendido y glamuroso na Astor Courts na 2010. E lugar cu un bista sereno y romantico riba Hudson River.
#6 LIZA MINNELLI & DAVID GEST
$4.2 MIYON
E sensacion di canto Liza Minnelli a casa cu e promotor di concierto, David Gest, den un ceremonia extravagante na Fifth Avenue New York na 2002. Entre e invitadonan tabatin Jackson Five y como padrino Michael Jackson y madrina Elizabeth Taylor. Sin embargo, e pareha no a dura, ya cu nan a separa un poco mas cu un aña despues. Nan divorcio cinco aña despues a ser califica como esun ‘mas sushi’ di Hollywood. Gest a keha cu Liza tabata batie despues di bebe demasiado alcohol.
#7 ELIZABETH TAYLOR & LARRY FORTENSKY
$4 MIYON
E leyenda di Hollywood Elizabeth Taylor a conoce e trahador den construccion, Larry Fortensky den un rehab unda ambos tabata interna pa nan problemanan di droga. Un historia di amor interesante y unico cu a capta e atencion di hopi hende. E pareha a casa na 1991 na Neverland Ranch di Michael Jackson. E ceremonia tabata repleto di celebridad entre e invitadonan. Despues di cinco aña, nan a separa pero a sigui bon amigo te na morto di Taylor na 2011. E actriz a laga $ 800,000 pa Fortensky manera cu tabata indica den su testamento.
#8 PAUL MCCARTNEY & HEATHER MILLS
$3.6 MIYON
E leyenda di musica Paul McCartney y e empresario Heather Mills a casa na 2002 den un kasteel na Irlanda. Na e ceremonia a asisti 300 invitado cu a wordo sirbi un menu vegetariano na e luhoso recepcion cu a sigui despues. E matrimonio no a dura mucho, ya cu e pareha a separa 4 aña despues y finalmente a divorcia na 2008. McCartney mester a paga Mills alrededor di $ 27 miyon y mas $ 13 miyon na bienes.
#9 ELIZABETH HURLEY & ARUN NAYAR
$2.6 MIYON
E modelo y actriz britanico Elizabeth Hurley a casa dos biaha cu e empresario Indio Arun Nayar. E prome tabata na 2007, cu nan a celebra na Sudeley Castle na Sudeley, Inglatera. E di dos tabata na Umaid Bhawan Palace na Jodhpur, unda e pareha a trece Elton John pa presenta na nan bruid. Despues di 4 aña e pareha a divorcia debi na e imagennan di Elizabeth unda e tabata sunchi e hungador di cricket australiano Shane Warne.
#10 CHRISTINA AGUILERA & JORDAN BRATMAN
$2.2 MIYON
Christina Aguilera y e ehecutivo di seyo musical Jordan Bratman a casa na 2005. Aguilera y Bratman, cu tabatin 24 y 27 aña respectivamente, a celebra e ceremonia den un tent memey di un vineyard den Napa Valley. Aguilera a bisti un shimis costoso di Christian Lacroix pa su matrimonio, sin embargo e pareha tabatin un fase tumultuoso cinco aña despues. Nan a purba di reconcilia pa e bienestar di nan yiu Max, pero a divorcia na 2010.
