Hopi persona no ta realisa nan metanan pa ta financieramente liber y evita cu nan ta involvi nan mes den hopi debe, pasobra nan no ta biba segun e realidad di nan entrada. Por ehempel si bo ta gana un salario di 4,000 florin pa luna, bo gastonan mensual no por surpasa bo entrada financiero. Pa hopi facil cu esaki ta zona, hopi persona ta scoge pa cumpra hopi material of servicio, cu no ta un prioridad of necesario y asina ta drenta den un ciclo vicioso di debe tras di debe. Tambe ta importante pa tin un idea realistico di cuanto bo gastonan mensual ta y kico tur ta e cosnan cu mester ta paga na e momento cu bo ricibi bo pago mensual. Di e forma aki bo tin un miho bista, di cuanto placa bo por uza y kico tur ta necesario pa haci encuanto compra pa e luna ey.
Algun otro punto importante cu lo por yuda bo garantisa, cu 2020 lo ta e aña cu bo lo disfruta mas hopi di bo finansa, sin cu esaki ta forma un debe of stress ta:
Identifica unda tur bo placa ta bay
Traha un lista di tur e debenan cu bo tin pa luna, pa siman y tambe esunnan cu bo tin 1 of 2 biaha pa aña. Por ehempel: hipoteca, impuesto, compra di comestibel semanal of mensual, awa, coriente, internet, cuenta di telefon y cuenta bancario.
Crea un cuenta bancario y mantene esaki activo tur luna
Un cuento bancario di spaar no ta solamente efectivo pa esunnan cu ta desea pa haci un biahe cu famia of kisas kier spaar pa un evento of algo special, pero esaki por funciona tambe como un “emergency funds”. E ta beneficioso pa tin por lo menos AWG 1,000 riba bo cuenta di spaar y no uza esaki, solamente den situacion di emergencia of un cuenta riba man. Di e forma aki bo ta evita di fia placa y crea debe innecesario na banco of e banconan di credito.
Reconoce algun habito negativo cu bo tin encuanto compra y gasto
Hopi biaha nos no ta realisa cu nos habitonan por ta un di e causantenan di nos debe innecesario y asina no ta yega na realisa un surplus den nos finansa. Por ehempel, si cada dia bo ta cumpra un bleki di refresco na balor di AWG 1.75 na final di un siman esaki ta AWG 12.75 y na final di un aña completo AWG 637.
