Duke y Dukesa di Sussex a anuncia nan decision di retira for di nan debernan real. Den un declaracion largo cu a post riba Instagram, Harry y Meghan, cu a caba di bolbe di nan break di seis siman na Canada, a revela cu nan ta planea pa bira financieramente independiente y ta bay dividi nan tempo entre UK y US. E pareha a scirbi: “Despues di hopi luna di reflexion y discusionnan interno, nos a scoge pa haci un transicion e aña aki pa cuminsa forma un rol nobo progresivo den e institucion aki”.
“Nos tin e intencion pa dal un stap atras como ‘senior members’ di e Famia Real y traha pa ser financieramente independiente, mientras nos ta continua apoyando plenamente Su Majestad e Reina. Ta cu boso estimulo, particularmente den e ultimo añanan, cu nos ta sinti nos prepara pa haci e adaptacion aki”.
Harry y Meghan, cu ta mayornan di Archie, di ocho luna, a continua bisando cu nan lo dividi nan tempo entre Reino Unido y Merca di unda Meghan ta nativo, y nan a agrega: “Awor nos ta planea pa ekilibra nos tempo entre UK y US, continuando nos deber cu e Reina, Commonwealth y nos patrocinionan. E ekilibrio geografico ta permiti pa cria nos yiu cu un apreciacion di e tradicion real den cual el a nace, mientras cu e ta brinda nos famia e espacio pa focus riba e proximo capitulo, incluyendo e lansamento di nos entidad benefico nobo”.
“Nos ta spera di comparti tur e detayenan di e proximo paso emocionante aki na su debido tempo, mientrastanto nos ta continua colaborando cu The Majesty The Queen, The Prince of Wales, The Duke of Cambridge y tur e partinan relevante. Te ey, acepta nos mas profundo danki pa boso continuo apoyo”.
E noticia a cay como un sorpresa pa e fanaticonan di e realesa, cu a caba di mira Harry y Meghan bolbe den e ‘limelight’ riba diamars. E pareha a bishita Canada House na London unda nan a reuni cu Janice Charette, High Commissioner di Canada na Reino Unido, pa gradici nan pa e hospitalidad calido y e apoyo cu nan a ricibi durante nan estadia na e pais.
