E cantica cu Ataniro ta considera como ‘the bomb’ den su trayectoria como musico, ta ‘Suave’ (Chicknan cool, Guynan rustig). E genero cu Janiro mas ta uza y scoge ta rub a dub y soca, ya cu eseynan ta e genero cu e mes ta scucha y gusta for di su hubentud. Janiro ‘Ataniro’ Eisden a lanta den e districto di San Nicolas, band’i Gallo Rojo y ta bin di un famia humilde y trahado. Musica semper a biba den Ataniro y p’esey mes musica kiermen bida p’e. Prome cu cada presentacion, Janiro ta hinca rudia y haci su oracion y ta pone den su mente, cu no tin ningun artista na mundo miho cu ne e momento ey.
Den edicion di revista FOCUS di januari, Ataniro ta conta con e ta habri aña 2020 y con el a wordo inspira na Medellin, Colombia pa mas proyecto. Durante un bishita na Medellin el a haci un photoshooting cu David Restrepo di Empresa dD Fotografia. David ta mesun fotografo cu a realisa un magnifico trabou cu por a ser mira net 1 aña pasa na januari. Esaki tabata e portada di FOCUS pa habri aña cu e boda di Sonaly & Jerusho na Medellin. Ataniro den FOCUS cu un entrevista unico!
