Na aña 1976 MARIANA ODUBER WERLEMAN a conkista e titulo di YOUTH QUEEN 1976, despues cu el a participa na eleccion di Reina Hubenil, representando Amity Organization. Tur cos tabata basa riba aparencia hubenil; tanto e presentacion como e shimis. E candidata ta riba escenario pa representa e hobennan, pues e mester keda mustra hubenil. E aña ey nan tabata 18 candidata cu a participa na e eleccion. Preparacion e tempo ey tabata minino compara cu awendia. Locual Mariana ta corda tambe ta, cu apoyo e anochi di eleccion tabata conta den e puntuacion.
For di tempo cu bo a bira Reina Hubenil pa despues eleccion cu bo dos yiunan a gana, con bo ta mira e evolucion di eleccion di reina?
Cu mi 2 yiunan e tabata ful diferente. Mi por hasta bisa cu, e ta un diferencia super grandi. E preparacionnan ta hopi, E trahe di gala a bira mas costoso, e competencia di trahe carnavalesco a haci cu bo no por bay con cu ta. Bo mester bay cu algo bunita, cual tin su gastonan cu ne, e shownan ta exigi hopi preparacion, organisacion, material, musica, efecto di luz, confetti etc. locual ta haci cu berdad e anochi ta bira un anochi espectacular, pero casi impagabel pa esunnan cu ta competi of kier competi.
Cua ta e recuerdonan di mas memorabel di bo temporada como Reina?
E recuerdonan ta hopi y bunita. E amistadnan cu bo ta crea y te cu awe ta existi. E invitacionnan cu bo ta haya pa presenta diferente caminda of tambe e invitacionnan pa bishita diferente restaurant na Aruba.
“Mi opinion personal ta, cu mester bin un cambio drastico den Eleccion di Reina di Carnaval, paso manera nos tur por constata, aki par di tempo no ta bay tin eleccion di reina mas. Sea ta laga e reina presenta cu shimis of un trahe carnavalesco, pero no tur dos. Y mester stop e asunto di show, cu ta costa hopi placa, locual ta haci cu niun mayor no ta laga nan yiu participa”.
Mariana a participa despues pa Reina di Carnaval?
Si mi a participa na aña 1981, representando Connie Francis Club pa Reina di Carnaval di Aruba y mi a bay cu e titulo di 1st Runner-up di cual tambe mi tin bunita recuerdo, sigur cu e momentonan hopi memorabel y agradabel.
Cua ta e reinanan cu segun bo, a haci un impacto den Eleccion di Reina?
Pa mi e Reina cu semper mi ta keda recorda ta Marjorie Flemming q.e.p.d. E tabatin un tremendo presentacion riba escenario. Mane nos semper ta bisa: “Marjorie a impacta”. Y mi ta hopi contento di por a forma parti di e team, cu a yuda prepara su yiu, Zuriah Flemming, den e Eleccion di Reina pa Carnaval 60, unda cu Zuriah a sa di conkista e corona tambe.
Ki ta bo opinion tocante e musica di Carnaval antes compara cu awor?
Pa locual ta e musica, mi ta haya cu e musica di antes tabata mas trankil y super great. No cu mi no ta gusta e musica di awo, paso mi tambe ta bay cu tempo. Pero e nostalgia ta keda. Te ainda ora mi scucha e cancionnan di mi tempo, mi ta lanta pa balia.
Como mama con bo a experiencia e momento cu ta bay scoge e reina y cu bo yiunan a gana?
Di Gossy-Ann na 1997 mi ta corda cu mi a core subi stage pa braz’e y felicit’e. Y tempo di Gilliany mi a bay sconde den auto, pa despues nan bin rondia mi y hiba mi bek den stadion. Ta momento cu lo mi no lubida. Y super contento cu tur 2 a logra conkista e corona den nan eleccion.
GOSSY-ANN ODUBER
CHILDREN QUEEN 1997
Ki ta loke mas bo a gusta y corda di Eleccion di Reina Infantil?
Esaki ta un storia pret cu mi ta corda. Prome cu e eleccion mi mama y tata a bin cerca mi y nan a puntra si mi ta interesa den bay pa reina. Como mucha chikito y un tiki tomboy, na prome instante mi no tabata kier, pero mi a bisa mi mama cu si mi bay y gana, mi kier un bais regalo. Di chikito caba mi tabata negosha. E mainta despues cu mi a gana eleccion, mi a lanta y haya no uno, pero dos bais. Mi mama y tata a cumpra uno pa mi, pero e tempo ey SAC tabata regala e ganadornan tambe bais. Dus ami a keda contento!
Un otro recuerdo pret cu mi tin ta ora mi ta riba e stage dunando mi speech. Mi a bira wak abou y mi mama tabata duna mi señal kico pa bisa, pero en bes di yuda mi, el a bruha mi! Mi a lanta cara sin wak bek, pa asina mi mes caba mi speech. Tambe mi ta corda ora nos ta bailando y e Reina Infantil di e aña anterior tabata baila nos dilanti y el a punta na su boca y smile, pa asina mi mes no lubida pa smile y gosa ora di baila.
E ta keda un experiencia cu mi no ta lubida. Aunke tabata hopi aña pasa y mi tabata hopi chikito tin mas cos cu mi ta keda corda. E cosnan chikito, pero cu a impacta mi y a keda cu mi.
GILLIANY BRIESEN – ODUBER
YOUTH QUEEN 2004
Con bo a experiencia e temporada di Carnaval y bo miho recuerdo di e Eleccion di Reina Hubenil?
E aña cu mi a sali reina tabata Carnaval di 50. Tabata un temporada largo, pero sigur hopi dushi. E paradanan tabata gigantesco, colorido y sin duda sumamente luhoso! Tabatin 10 reina of mas ta competi e tempo ey na e Elecionnan di Reina. Mi ta corda hopi momento bunita durante henter e temporada, por ehempel, mirando mi wela sinta den publico, ora mi tabata riba e escenario, e aplauso ricibi durante e paradanan, e apoyo den stadion y sin lubida e sosten di mi famia y mi amistadnan.
