Maribel Andrade ta e prome Reina di Tripel Corona di e celebracion grandi di Aruba, esta Carnaval. Maribel tabata REINA INFANTIL 1994, representado Kids in Action, YOUTH QUEEN 2002, representando Revista Pan Cayente y CARNAVAL QUEEN 2010, representando TOB Carnival Group. Maribel ta felizmente casa y ta mama di dos yiu. E ta eherce e funcion di juffrouw di scol y den su tempo liber e ta gusta wak series y bay relaha na restaurant. Banda di esey Maribel ta gusta biaha, conoce luga y cultura nobo.
For di momento cu Maribel a gana Reina Infantil, el a sigui pa e siguiente categoria den Eleccion di Reina. Maribel ta conta cu e ta corda cu el a gusta e anochi masha, bailando y presentando riba stage. Como mucha, e tabata un anochi sin stres, paso e no tabata compronde mucho bon e peso di eleccion. Su speech a bay super bon, cu te dia di awe Maribel ta cord’e y e show su tema tabata Barbie. E di dos corona, esta di Youth Queen, Maribel a gosa di ful e temporada di Carnaval masha hopi mes. E biaha aki si Maribel tabata compronde tur cos y e tabata kier a bay cu e corona, pues el a dedica hopi tempo na memorisa su speech y train tur su bailenan.
El a bira un meta pa cumpli pa participa despues pa Reina di Carnaval?
Si el a bira un meta mirando, cu mi a disfruta asina hopi di e dos otro eleccionnan. Mi kier a haya e oportunidad di bolbe experencia esaki un biaha mas. Mi a haya great tambe cu mi tabata tin e chens di logra ta e prome mucha muher na Aruba pa gana tur tres titulo.
Compara cu e dos eleccionnan anterior …con e preparacion tabata pa Reina di Carnaval pa bay pa di 3 corona?
Pa reina grandi mi tabata mas involvi den e decision den proceso. Mi tabata por a scoge e cosnan cu ami gusta pa forma parti di mi presentacion. Tambe pa reina grandi mi no a bay cu un preparador di reina, cual infantil y hubenil si tabata e caso.
Cua bo ta considera bo mihor momentonan como Reina?
Sin duda e paradanan. No tin mihor sentimento cu baila den parada y sinti e apoyo di tur hende na canto di caminda. Ohala tur hende por experencia esaki un dia!
Kico segun bo cu tabata e impacto cu bo a gana tur 3 eleccion di Reina na e diferente edadnan?
E impacto riba mi mes ta, cu el a pone mi realisa cu bo no mester tin miedo di un reto. Cu perseverancia, positivismo y dedicacion bo ta logra.
Tin un anectoda particular cu bo ta corda di e eleccionnan?
Durante e Eleccion di Reina Hubenil mi tabata hopi nervioso durante e premiacion. N’e momento cu mi tabata riba stage bailando y wardando resultado, mi a bira lomba pa publico y puntra e prins hubenil di e tempo ey, Ronwayne Kock, si mi a gana. El a bisa mi cu e no sa ainda. M’a sigui baila, pero despues m’a bolbe bira y hacie e mesun pregunta. E biaha aki si el a contesta mi cu si. M’a keda trankil y sigui baila. Unabes nan a hisa mi man mi a cuminsa bula y celebra.
Bo ta activo den Carnaval? Of ta coach reina?
Sigur! Tur aña mi ta train reina di e diferente categorianan. El a bira un pasion di mi, cu mi ta haci cu hopi amor. E reinanan a yeg’i gana diferente titulo y nos a keda cu e amistadnan hopi special. Mi ta spera di por keda haci esaki pa hopi aña mas.
Kico bo lo conseha pa e organisacion haci pa engrandece Eleccion di Reina bek?
Por purba trek e scolnan y uza como incentiva cu lo tin premio pa e reina y scol ganador. Tambe mi ta kere cu e premionan por ta mas atractivo. Alabes ta importante pa evalua tur aña cu e reinanan y nan team y aplica di biaha e cambionan pa mehoracion.
Kico pa bo tabata nifica ta e unico reina cu a gana tur tres eleccion?
Esaki ta algo hopi special pa mi! Mi ta contento di por a aporta na Carnaval di Aruba. Y ta sinti mi hopi afortuna, cu mi tin un logro chikito cu lo pasa pa historia di Aruba su Carnaval.
