Cana ta un actividad asina cotidiano cu ta subestima su beneficionan pa salud, specialmente si nan ta constante y intenso, manera: mehora bo capacidad respiratorio, reduci e problemanan cardiovascular, activa metabolismo y yuda na retene menos likido. Tambe bo por baha peso y perde e ‘kilitos di mas’. Sinembargo bo mester sigui cierto regla, pa bo wak e resultadonan. Aki FOCUS Salud ta bisa bo cua nan ta:
1 Ta constante
Pa perde peso cu caminata ta fundamental pa bo hacie cu cierto frecuencia. Ideal ta pa cana diariamente pa un periodo determina. Si no ta posibel, trata di hacie tres pa cuatro biaha pa siman. Esaki ta esencial pa wak resultado. Den entrevista cu revista Women’s Health, e entrenadora personal, Hannah Davis, a recomenda pa bo trata di yega por lo menos 15 mil stap pa dia, shete dia pa siman, si bo kier wak resultado.
2 Tempo
Si bo kier baha peso canando, bo tin cu compromete pa hacie minimo 30 minuut diario. Esaki ta yuda bo mantene un Indici di Masa Corporal mas abou y bo ta baha bo cintura, specialmente e famoso ‘love handles’ na bariga.
3 Velocidad
Mantene un ritmo constante y lihe ta esencial pa bo por baha peso canando. Trata di midi ki lihe bo ta cana, pa bo no baha bo velocidad y cada bes mehora. Pone atencion na e movemento di bo brasanan, e contraccion di bo abdomen, cu bo no ta dobla bo curpa y pa mantene e puntanan di bo pia eleva e mayor parti di tempo. Davis ta recomenda cana riba un tereno cu inclinacion of subi trapi. Ademas esaki ta yuda na kima mas caloria, añadi e intervalonan aki por lo menos 3 biaha pa siman.
4 Traha cu bo propio peso ora di cana
Otra recomendacion di Davis ta pa no enfoca solamente riba canamento. Cada 5 of 10 minuut bo mester para pa haci squats, stretch of bula. Nan ta yuda bo mehora bo ritmo cardiaco y ta fortalece bo musculonan.
