Oficialmente como Director di Aruba esaki ta e prome biaha cu Endy Croes & N-Designz Team hunto cu Perfect Me y The Salon, a prepara un reina pa bay competi internacionalmente. Na 2018 nan a prepara Raquelle Reeberg pa Reina Hispanoamericana pero bou di un otro organisacion. E intencion pa manda un reina na e competencia aki ta, pa e reina ta den preparacion pa un dia representa Aruba na un di e certamennan mas grandi mundialmente. Pues, esaki ta nifica cu Sarah van Steen ta den preparacion bou guia di N-Designz pa den futuro. E certamen ta tuma lugar dia 8 di februari y Sarah a biaha hunto cu su mama pa Bolivia pa compañe e prome 5 dianan. Despues Endy mes a biaha pa Bolivia pa e ultimo siman pa e guia extenso den e recta final.
REINA HISPANOAMERICANA
Den un combersacion cu Endy Croes, el a splica cu e certamen di Reina Hispanoamericana ta concentra hopi riba
estetica, beyesa, habilidad pa mercadia e reina y e productonan cu ta sponsor
di e evento. Ademas Reina Hispanoamericana ta busca un muher cu por ta role model
pa e muhernan cu descendencia Latino. Pa locual ta e preparacion di Sarah van
Steen, esaki a cuminsa di momento cu el a participa na Miss Teen Aruba
International na 2018 y a gana e titulo di 1st Runner-up. E tempo ey caba a
enfoca pa Sarah por comunica cu mas contenido fuerte y pa combersa na un nivel
cu ta inspira otronan. Sarah ta un mucha muher cu un amabilidad sincero y
cordial y esaki sigur ta un di su partinan mas bunita y fuerte. Prome cu Sarah
a biaha pa Bolivia a sigui polish loke ya a start cu ne y awo cu Endy ta na
Bolivia, e ultimo tokenan pa refina lo wordo haci.
Cua ta e cualidad cu segun bo experiencia ta laga Aruba luci den e certamen aki?
Sarah riba su mes cu su spontanidad, alegria sincero, estatura y e color di cabey impactante ta percura pa e hala atencion sigur. Pero, mescos na otro certamennan, e faboritismo pa e paisnan grandi manera: Venezuela, Colombia, Filipinas y Mexico ta grandi. Esey kiermen cu Aruba como isla chikito, tin cu traha extra duro pa haya e atencion desea y mereci. Sarah ta consciente di esaki y pesey ta percura pa e impresion cu e ta laga atras tur dia ta memorabel cerca tur hende na Bolivia.
Ki ta bo opinion tocante e reciente escandalo na Miss Global cu Miss Colombia?
Den mi opinion, si fraude ta tuma lugar, esaki mester wordo vocifera. Porta e forma cu Miss Colombia a hacie no tabata esun di mas netjes, pero mi ta kere ta hopi factor mester a hunga un rol, cu e acumulacion di frustracion a resulta den loke a sosode riba escenario. Sigur loke el a haci ta bay den historia mustrando cu no mester keda keto y acepta cosnan cu no ta cana manera debe ser.
Ki por anticipa pa e presentacion di Miss Aruba pa e final di Reina Hispanoamericana?
Por spera un presentacion di un dama educa, cu estilo clasico y elegante y cu lo sa di trece su opinionnan padilanti di un manera hopi elocuente. Sarah ta papia spaño, pero den ingles e por expresa su mes hopi mihor y pa e motibo ey, e lo haci uso di un traductor durante su entrevista priva cu hurado y riba escenario. Pa loke ta su shimis final, tin 2 opcion espectacular cu ainda lo mester dicidi cua lo ta esun mihor pa su presentacion final.
