E yegada di e hende muhernan cu a ricibi nan homenahe “Exemplary Women of Aruba” tabata yen di expectativa. E limousine blanco yegando cu elegancia e evento tabata impactante, y mirando e hende muhernan tur bisti na preto bahando cu hopi estilo. Na e opening di e show e MC a anuncia e seis hende muhernan cu a ricibi e homenahe: Flor Lacle, Janella Gomez, Ellen Kuster, Misha Wever, Merelitsa Croes y Betty Adkins.
Nan tabata manera e esculturanan di Miguel Angel, pero real riba e escenario. E arte escultural di Renacimento Italiano tabata imprimi den e seis hende muhernan aki cu nan presencia imponente. Cada uno a luci cu extravagancia nan outfit demostrando empoderamento muscular. E parti mas importante di e evento segun Carlos Centeno, e persona cu a inspira e homenahe aki, ta e parti di ‘conversatorio’ riba escenario.
E publico tabata concentra den cada opinion y cada gesto di e seis hende muhernan. E tabata informativo y humoristico unda na algun ocasion tabatin un confrontacion santo riba cierto puntonan di bista. Durante e conversacion por a percibi e sinceridad y profundidad di cada uno, ademas di e contesta- y recomendacionnan riba e preguntanan cu e publico tabata haci na e hende muhernan. Pabien na Flor, Janella, Ellen, Misha, Merelitsa y Betty cu nan reconocimento, y tambe Carlos Centeno cu un evento unico.
