Diabierna dia 21 di februari tabata un dia super feliz pa e pareha, Sue-Ann Ras & Tito Laclé, cu despues di ta comprometi dos aña caba y tabata buscando e momento perfecto pa casa, a bisa SI durante un ceremonia emocionante den presencia di famia y sernan keri. Sue-Ann a yega radiante den su shimis creacion di Ronchi de Cuba, y a ser ricibi pa su tata, Ronnie Ras, pa hunto drenta Stadhuis, unda Tito tabata spera hunto cu su kerida mama, Sefora Laclé-Pijpers. Como e testigonan a fungi Willie Chin y Aurora Dijkhoff, ambos persona cu tin un significacion hopi special pa e pareha.
Sue-Ann den su entrevista pa revista FOCUS a bisa cu nan ta bin di dos mundo diferente, y esey ta haci esaki y tur otro cos un reto extra. E no tin un caracter facil y Tito tampoco. Nan metanan ta pa siña di otro, duna otro su espacio necesario, sostene otro, specialmente e muchanan: Sue-Gin, Ginayla y Leandro den nan decisionnan y caminda di bida y pa nan dos bira bieu hunto. Durante e ceremonia e palabranan dirigi na e pareha tabata contene un mensahe cu por refleha un poco riba locual ya Sue-Ann a bisa anteriormente y sigur hunto cu Tito nan ta complementa otro den nan bida matrimonial.
E celebracion di e enlace di e ‘power couple’ aki tabata uno espectacular cu tur detaye ‘on point’ na un fabuloso residencia cant’i lama na Savaneta. Un decoracion sumamente chic a crea e esfera di elegancia den un setting caribense, unda e invitadonan a disfruta di un anochi magico. Un momento cu no por a falta tabata e speech di Tito dirigi na su casa Sue-Ann, unda el a comparti su impresion momento cu el a mira Sue-Ann para band’i dje na Stadhuis, cu ta pa prome biaha el a wak den su shimis y a keda completamente conkista pa semper. Nan prome baile tabata un mix special y un wals pa habri e pista di baile. Pabien Tito & Sue-Ann… Hopi Amor y Felicidad!
