E legendario director creativo di Chanel a yega di bisa, cu su pushi blanco tin su propio fortuna door di e ingresonan genera pa su trabou como modelo, cu el a warda religiosamente. Cu e lo a inclui su pushi den su testament pa garantisa cu e lo sigui disfruta di e cuido y luhonan, cu el a encarga pa dune a traves di dos cuidador cu tabata turna pa consentie tanto di dia como anochi.
Sinembargo, finalmente su ‘oogappel’ no a bira su heredero principal. E ‘protégé’ y amigo intimo di e diseñador,Baptiste Giabiconi, ken ta resulta ademas di ser e prome doño di Choupette, a confirma den un entrevista den e programa frances Sept à huit , cu e ta e principal beneficiario di e patrimonio inmenso di Lagerfeld, cu ta inclui propiedadnan inmobiliario, obranan di arte, companianan y mueble. “Tin shete heredero clave y den e lista ey, mi ta den e prome posicion”, e modelo a confirma, cu ta e persona cu a introduci e pushi di raza birmana den e bida di Lagerfeld tempo cu el a pidie pa cuide durante algun dia den su ausencia. E animal nunca mas a bolbe e cas di Giabiconi y e mester a busca un otro mascota.
E amistad entre e modelo y e famoso diseñador -cinco decada mas grandi cu ne – semper tabata rondona pa cierto misterio pa e secretismo rond di e vinculo cu tabata existi entre ambos. Giabiconi a afirma cu entre nan tabata existi: “un relacion filial hopi poderoso y un amor dificil pa splica cu palabra”, cu a pone Lagerfeld pensa riba e posibilidad di adopte. Semper e tabata kier a proteha y trankilisa Giabiconi y tabata bise: “No preocupa, Baptiste. Bo lo ta bon cuida”. E diseñador nunca tabata kier a discuti cu ne tocante e detayenan di su cancer di pancreas, e causa di su morto na edad di 85 aña dia 19 di februari 2019.
Baptiste: “E tabata sconde esey hopi bon y no tabata kier a papia riba tema. Mi a enfrente un biaha cu e pregunta directamente, mi a puntre si e tin cancer y si e ta grave, pero el a contesta cu un gesto cu su cabes y bisando cu pa mi no preocupa, cu e tin e miho dokternan y cu lo e recupera”.
