Desde London Mrs. Eva Schloss a biaha pa Aruba unda e ta bay comparti su historia di triunfo y supervivencia, tolerancia y paz, mayan 7or di anochi na Hilton Aruba Caribbean Resort & Casino – Grand Morris Lapidus Ballroom. Desde 1985, Eva Schloss ta dedica su mes na educacion riba e Holocausto y paz global. El a conta su experiencianan den tempo di guera den mas di mil charla. E obhetivo ta pa organisa un anochi inspirativo y educativo, cu ta priminti pa biba den e historia di Aruba den e añanan venidero.
Mrs. Eva Schloss a keda hopi agradeci cu e atencion cu e ta ricibiendo na Aruba. El a haya un recorido cortico unda e por a conoce The Lighthouse, el a disfruta di e gastronomia eskisito na nos restaurantnan. El a keda encanta cu e pueblo di Aruba y nos isla, bisando di tur parti di mundo cu el a bishita, Aruba ta e isla di mas bunita, mas limpi y cu e lama di mas maraviyoso cu el a conoce. E ta un honor pa e ta aki riba nos isla y el a pasa e shabbat na sinagoga, unda el a cende tres bela pa su tres yiunan, cu ta un custumber Hudiu di tur mama pa hacie riba shabbat.
Den un combersacion cu Mrs. Chaya Blasberg, casa di Rabbi Mr. Ahron Blasberg, el a remarca cu Aruba aunke ta un lugar chikito por ta un ehempel pa henter mundo. Ora tuma oportunidad manera esaki pa educa nos mes, un comunidad y siña e siguiente generacion, nos por inspira pa haci mas ainda y ta un ehempel pa diversidad y paz global. E ta kere firmemente cu un acto chikito di bondad y amabilidad tin su efecto y lo haci nos mundo un mihor lugar. Dicon nan a scoge Aruba pa Mrs. Eva Schloss duna su charla, ta door di nos conexion cu Hulanda y nos isla ta e unico lugar den e parti mundo aki cu tin un estatua di Anne Frank.
Mrs. Schloss a brinda ayera mainta un ofrenda floral na e estatua di Anne Frank na Wilhelmina Park, unda hunto cu Prome Minister, Evelyn Wever-Croes, a brinda nan respet na Anne Frank. Mrs. Eva ta un trustee di Anne Frank Educational Trust, autor di tres buki y tema di e obra di James Still, “And Than They Came for Me: Remembering the World of Anne Frank.” Mescos cu su ruman di criansa, Eva a bay sconde na Hulanda te ora hunto cu su famia nan a wordo traiciona, captura y hiba na Auschwitz-Birkenau kamp. Drenta den e mundo di Anne Frank conta pa su ruman di criansa y amiga di infancia, mayan den un evento extremadamente unico pa scucha e historia poderoso di Eva.
