Den edicion di revista FOCUS di maart ta ilustra un hende muhe Arubiano, kende cu firmesa ta declara cu ta keda kibra e bareranan y demostra cu nada ta imposibel. Derchlien desde un edad relativamente jong su educacion basico a consisti di un mix di scol publico na Hulandes y scol priva na Ingles te cu su temporada den ‘high school’ cu el a atende ‘International School of Aruba’. Esaki tabata door cu el a emigra na varios ocasion na diferente pais hunto cu un miembro di famia. E temporada cu el a yega Hulanda, el a studia na Ingles cu un ‘double major’ den ‘Marketing & Communications & Business Management’, sigui pa ‘Small Business Entrepreneurship Management’ na FAU, Florida. E prome biaha cu Derchlien a muda pa Boneiro tabata na final di 2010. El a traha na Oficina di Turismo durante e periodo di un aña y despues pa Stinapa durante casi un aña. Despues nan a bolbe Aruba y e temporada ey no tabata nada facil pa nan famia.
Den e ambiente di Fin di aña na Aruba, ora cu tur hende tabata preparando pa habri 2016 yen di expectativa, Derchlien tambe tabatin tur maleta prepara pa hunto cu su famia sali rumbo pa Boneiro dia 27 di december 2015. El a inicia su funcion den e departamento di mercadeo na TELBO, unda e trabou cu e tabata desplega a haya semper hopi atencion den prensa y su personalidad sigur ta un gran atributo den su carera profesional. Na momento cu Derchlien a mira e vacatura di Oficina di Turismo, pero e no a solicita mesora, pasobra e tabata sinti ‘okay’ na TELBO. Sin embargo, despues cu e pleno sosten di su casa, el a dicidi di manda e solicitud pa Oficina di Turismo y casi mesora el a ricibi un invitacion pa un entrevista. E pasion cu Derchlien tin pa e industria turistico nunca a desminui y e ta sumamente contento cu el a tuma e curashi pa tuma e reto aki. Despues cu el a ricibi e grato noticia cu el a bira e persona pa e funcion di Marketing Manager.
Derchlien tabatin un bon sentimento ora el a drenta Oficina di Turismo di Boneiro como e Marketing Manager nobo. E sentimento di confiansa cu ta aki e mester ta. Sabiendo cu e ta un reto grandi pa su persona y tambe pa e isla. Riba nos pregunta con e ta describi un dia of siman di trabou, Derchlien a contesta, cu nan ta habri e siman riba dialuna mainta cu un reunion cu henter e team. E meta di e reunion ta pa nan duna un update di locual ta trahando riba dje y presenta evento- of actividadnan na caminda. Despues di e reunion e ta print su agenda di siman cu ta indica reunion-, evento- of actividadnan cu e tin planea pa e siman. Cada pasa un siman riba diamars e tin reunion cu e miembronan di e departamento di mercadeo. Desde januari di e aña aki nan tin representante na Hulanda y Merca, y actualmente un of dos biaha pa siman nan tin un ‘skype call’. E ta forma parti di e ‘stuurgroep’ di e proyecto Blue Destination como ‘voorzitter’ di e reunionnan cu actualmente ta reuni cada tres siman. Den edicion di revista FOCUS di e luna di maart por lesa den un entrevista profundo dicon Derchlien Vrolijk-Dijkhoff ta orguyoso cu e ta keda kibra e bareranan y demostra cu nada ta imposibel!
