SETAR a organisa su Business Event 2020 y e topico di e aña aki ta un hopi actual y relevante pa e companianan, esta “Cyber Security”. E orador invita pa e aña aki ta Sr. John Sileo, CEO di Sileo Group, un grupo di experto riba e topico di privacidad, cu ta yuda e organisacionnan protega e privacidad cu ta impulsa nan ganashi.
Durante su discurso, Director di SETAR, Sr. Roland Croes, a comparti cu e aña aki el a cumpli 30 aña di servicio na SETAR y pa describi tur loke a pasa den SETAR durante e 30 añanan aki tin tres palabra ta bin na mente: Cambio, Innovacion y Crecemento. Con e cambionan den tecnologia a impacta SETAR, ora cu internet y mobilidad a crece y kico ta e cosnan cu SETAR a enfoca riba dje den aña 2019 den diferente area. Pa aña 2020, Sr. Croes a indica cu SETAR lo concentra riba mehora y reforza e “customer experience” di e clientenan di SETAR. E obhetivo ta cu pa final di 2020, e clientenan di SETAR nota un diferencia den e “reaction time” di SETAR, e stabilidad di nos rednan y e manera cu SETAR ta reacciona riba e peticionnan pa servicio.
Na su turno, e orador invita Sr. John Sileo a duna un presentacion interactivo cu humor, caminda el a conta di su experiencia como un victima di “identity theft” y e influencia cu esaki tabata tin riba su bida personal y profesional. Sr. Sileo a comparti algun ehempel di e menasanan cibernetico cu ta existi actualmente y con nos por ta mas alerta riba esakinan como tambe con pa reacciona si en caso algo sosode. E mensahe principal cu Sr. Sileo a trece padilanti ta, cu como compania nos mester inverti, no solamente den e tecnologia, sino tambe den e aspecto humano pa medio di educacion riba e topico di “Cyber Security”. Mas educa e personanan ta riba e tema, mas alerta nan lo ta y asina ta yuda preveni cualkier eventualidad.
