Caregivers of cuidado informal ta e personanan clave den e bida di sea un baby, mucha of tambe persona di edad, cu ta depende riba e cuido, atencion y sosten di e cuidado. Como mama di un mucha of cuidado informal di un persona di edad, sa tin momento, cu e peso y e responsibilidad aki ta trece cu ne, ta bira hopi inmenso y intenso y mas cu claro, por bira dificil pa maneha of balansa. Esaki por trece cu ne tambe e sentimento di stress, ansiedad, frustracion of te hasta yega na un ‘burnout’.
‘Burnout’ y stress no ta un fenomeno desconoci pa un cuidado informal, e mayornan, e maestronan y te hasta e studiantenan. E ta algo cu por pasa cualkier persona, di cualkier edad, pero specialmente e personanan, cu aparte di nan rutina diario di entre otro; maneha y cuida nan propio famia, obligacion laboral, responsabilidad y compromiso den nan bida personal, tambe ta cuida y duna sosten na un otro persona. Sentimento y experiencia di stress ta algo normal cu cualkier persona lo encontra algun biaha den nan bida. Loke ta haci stress algo peligroso y te hasta maligno ta, con hopi esaki por afecta bo salud y te hasta mata bo.
Pa cuida un persona, sea ta un baby recien naci, mucha of persona di edad cu demencia, por ehempel por ta estresante y tambe ta agrega na un peso di cansancio, pa un persona cu ta purba balansa esaki cu otro responsabilidad den su bida diario. P’esey ta sumamente importante, pa reconoce kico ta e señalnan di stress y ‘burnout’ y ki ora stress ta bira excesivo y ta laga bo core riesgo di un ‘burnout’.
Kico ta e diferencia entre stress y ‘burnout’?
Cientificamente ‘burnout’ ta algo cu bo por experencia como resultado di stress excesivo. Burnout ta forma, ora e sentimento y experencia di stress ta bira manera un ciclo di emocion negativo, sentimento constantemente di cansansio, fatiga, y paralisis (no por move of cana), cual ta evita un persona di por haci su trabou of rutina diario. Un ‘burnout’ ta diferente compara cu un experencia di stress, pasobra stress ta algo, cu mayoria biaha, no ta dura largo y despues di e periodo di stress, e persona ta mira un solucion of tin e habilidad di surpasa esaki.
‘Burnout’ ta ora e sentimento di stress ta acumula y ta cuminsa afecta bo salud emocional, fisico y tambe mental. Ora e experencia di stress aki acumula, e curpa fisico ta cuminsa protesta y no tin e capacidad mas pa haci nada, como cu ya esaki a cansa of a uza di mas, pa falta di descanso. E personanan cu tin un ‘burnout’ mayoria biaha no ta na altura di esaki, simpelmente pasobra nan ta custumbra di ta ocupa cu hopi cos pareu y e sentimento di stress ya caba a bira algo normal pa nan.
Nos curpa ta rekeri di mas cu 8 ora di descanso, pa asina por funciona optimalmente. Esaki ta nifica cu aparte di soño, nos curpa mester bon nutricion, tempo pa relaha y haci cos cu ta satisface nos salud mental y emocional. Pa cualkier cuidado informal of mayor, e ta importante cu tur aspecto di e salud ta optimal y saludabel pa asina por duna cuido y sosten na cualkier persona, incluyendo nan mes.
Kico ta e señalnan di stress y burnout?
Stress por causa cu bo ta bira irita of frustra mas lihe cu normal y tambe por cuminsa lubida mas frecuente.
E prome señalnan di stress ta entre otro:
- E persona ta involvi den mucho hopi compromiso y no por maneha su tempo- y obligacionnan mas.
- Sentimento frecuentemente di ansiedad, nervio, frustracion y iritacion.
- Dolor cronico entre otro dolor di cabes excesivo.
- Ta bira malo frecuentemente y e sistema inmunologico ta baha.
- Insomnia y perdida di energia lihe.
- Depresion.
- Problema cu memoria (lubida cos lihe of mas cu normal).
Despues cu e sintomanan di stress excesivo acumula esaki ta bira un burnout, specialmente si bo no ta reconoce of realisa, cu e stress ta bira un motibo pa haci un bishita na bo doctor di cas pa papia tocante esaki.
Kico ta causa ‘burn out’den cuidado informal of mayor?
Tin hopi factor cu por causa cu como cuidado informal of mayor bo ta experencia stress y ‘burnout’. E mas comun ta ora bo no por balansa bo responsabilidad y obligacion mas, no ta of por bisa “no”, y inabilidad pa prioritisa obligacion y tareanan. Otro causanan of cosnan cu por resulta na stress y ‘burnout’ ta:
- Miedo y Insiguridad
Mayoria biaha como cuidado informal bo por sinti miedo di laga e responsabilidad di cuida bo pa yiu, persona di edad of ser keri den man di un otro persona. E sentimento di culpa aki por trece cu como cuidado, mayor of yiu bo ta sinti extra responsabel pa haci esaki bo mes asta si e ta bin na costo di bo propio salud, tempo y felicidad.
- Presion Financiero
E costo pa cuida pa un baby, mucha of persona di edad por hunga rol den e decision pa busca un persona pa haci esaki. Esaki ta causa cu e necesidad pa haci esaki bo mes ta bira mas grandi y e sentimento di stress ta acumula mas. Cualkier situacion cu ta involvi placa por laga cualkier persona sinti un stress y mas ainda si e ta trata di un ser keri.
- Expecativa Irealistico
Mayoria cuidado informal especialmente di patientnan di Dementia of Parkinson’s Disease por tin un pensamento cu pa medio di dedica 100% di nan tempo, energia y atencion na e persona aki, e malesa lo por bay of e pashent lo por ‘mehora’. Den e situacion di un persona cu Dementia, e cuido siguramente ta haci un efectivo positivo especialmente si e interaction entre e cuidador y e patient ta uno positivo. Sinembargo, algun cuidador por tin un expectativa irealistico cu por causa cu nan ta inverti mas energia y tempo cu nan curpa por duna resultando den stress y burnout.
- Mentalidad Perfeccionista
Aparte di tin expectativa irealistico, personanan cu kier pa cada detaye ta perfecto of ta na su luga, por crea un situacion caminda tur su energia y tempo ta wordo inverti den haci esaki y otro aspectonan ta wordo neglisha entre otro salud propio. Un persona cu tin un mentalidad perfeccionista ta sinti un presion pa haci tur cos perfecto sin ningun eror. Figurativamente nos ta ‘burnout’ pasobra nos kier haci mas di loke en realidad nos por haci of handle.
Recuperacion di un ‘burnout’ ta un proceso continuo cu ta rekeri hopi tempo pa por compronde e origin di e sentimento di stress, con pa cambia esaki, y ki mecanismo of tecnica bo por incorpora pa asina reduci sentimento di stress cual por crea un burnout. Un di e formanan mas efectivo pa recupera y evita stress y ‘burnout’ ta pa simplemente pone bo mes como e prioridad maximo. Esaki ta nifica haci “self-care” un prioridad mesun importante cu cualkier otro obligacion. Pa por biba un bida saludabel, largo y feliz brindando sosten, aporte y cuido na diferente persona ta rekeri pa bo bira consciente di bo limitenan y paga tino na e señalnan cu bo curpa mes ta duna ora e mester di un descanso of momento pa recarga.
