Como diseñadora y trendsetter, Gigliola Gomez, tabata sinta na su cas momento el a haya inspiracion pa traha un mondkapje, cu lo sa di dune y su hendenan proteccion. El a uza e colornan colorido di nos Caribe, nos isla, manera mester recorda con nos tur ta biba riba e pida baranca aki ALEGRE… Asina ta pone un poco color den e dianan dificil cu nos ta bibando y cu ta nos dilanti.

Cu cada diseño cu el a confecciona, e ta cumpli cu e deseo di cada un di su clientenan. Su creacionnan ta wordo haci cu amor y dedicacion. Mesun amor cu e tin pa su pais. Gigiola a bisa: “Hunto nos lo sali di e temporado dificil aki.

Un di mi masknan faborito ta esun di flor. Dicon? Esaki paso esaki ta simbolisa e colornan di mi pais. Y tambe e flor cu ta simbolisa cuido, door di cuida e flor tur dia door di dune  awa y atencion, e lo sa di florece y sigui crece bira grandi”.

Pa locual ta e crisis di coronavirus, pa Gigliola Gomez  ta algo cu sigur e lo no kier experiencia nunca mas! No solamente den e forma cu e ta afectando nos pida baranca, pero sigur con e ta afectando mundo henter. Caminda miles di hende ta muriendo y sin cu por tin un cura p’e ainda. Nos grandinan cu asina tanto a siña nos y a traha duro pa asina por a prepara nos pa e mundo aki, awor ta esunnan mas vulnerabel pa e virus aki. Mester bisa esaki ta un experiencia cu nos tur ta biba cu hopi dolor y sigur siñando di dje tambe.

Den parti profesional mirando cu varios di su diseñonan ta ubica na diferente hotel rond Aruba, e ta sigur cu no ta su so a sinti esaki, pero henter Aruba mirando cu nos unico pilar di economia a wordo afecta asina duro door di e situacion aki.

Cada diseño y coleccion cu Gigliola Designs tabata saca, e tabata promove su isla na diferente parti di mundo y localmente tambe. Semper el a traha cu amor pa su pais. Esaki lo ‘slowdown’ pa un tempo pero lo no stop di sigui promove  Aruba ni tampoco sigui diseña pa su hendenan local, cu semper a apoye. E tin tur Fe cu pronto nos lo sali di e mal tempo aki hunto!

Den e parti familiar nan ta bezig ta sigui tur e medidanan pa no contagia cu  COVID-19, cu ta #keda cas y no ta sali riba caya si no mester. Gigliola ta un persona cu diariamente su schedule ta full cu meetings, etc… sinembargo atardi semper e ta na cas pa atende su ‘boys’. E yiu hombernan  ta ‘homeschooling’ actualmente, e ta bisa danki na e sistema di online school di International School, cu e temporada aki no ta afecta e estudio di su yiunan. Awor nan tur ta na cas haciendo nan ‘daily’ schedule sin cu mester sali di cas y na mesun momento nan tur ta safe.  Gigliola ta bisa danki na tecnologia y den tur cos malo semper nos mester busca e parti positivo Un di e modelonan di Gigliola Design, Arnalda Lampe, ta mustra e diferente prints di mondkapjes di e coleccion. Di e forma aki Gigliola ta yuda nos comunidad, paso esaki ta e momento pa nos tur uni  y duna otro un man . Y tambe mirando e scarcedad di material medico cu tin rond mundo actualmente. E ta sigur cu di e forma aki ta yuda alivia e situacion cu ta reinando actualmente.

LEAVE A REPLY

Please enter your comment!
Please enter your name here