Un di e cantantenan hopi popular na Aruba cu ta forma parti di Tsunami y ademas ta un entrepreneur, doño di su mesun compania di mercadeo y multimedia. E situacion di COVID-19 a afecta tur dos trabou di Mitch, y tambe di su famia. Nan tur ta na cas, pero ta uzando e tempo liber pa planea mas riba un proyecto cu nan tin andando y tambe drecha diferente cos rond di cas. Mitch ta uza tambe e extra tempo pa pasa mas ainda den cushina y traha platonan cu semper e kier a siña traha. Te ainda nan no a yega na un dia cu no tin nada di haci.
Ora cu Mitch a tende di e prome caso, el a sinti un poco miedo: “Pero no miedo di e virus mes pero mas bien con e lo afecta nos bida, economia, y con un grupo di hende lo reacciona cual lo causa mas daño cu mester. Mi tabatin fe cu nos lo vence e virus, pero por mira cu fabia di algun hende cu no ta ‘team-players’ den comunidad, esaki no a logra. Si nos tur a scucha y tene nos mes na e reglanan poni, kisas nos lo ta casi sali caba di tur e medidanan”.
Con bo ta mantene bo mes positivo durante e crisis aki?
Asina mes mi ta keda positivo sabiendo cu nos lo vence esaki! Mi ta probecha di e tempo pa completa algun proyecto atrasa, y manera m’a menciona planea aun mas mihor esnan cu lo sigui despues di e crisis.
