Un fashionista cu semper ta ‘up-to-date’ pa loke ta trends di moda y cu a ricibi un reconocimento como FOCUS Best Dressed 2017. Yohana Roos ta Office Manager na nan empresa, Roos Sea Services & Ent. N.V, y den su tempo liber ta un RYS 200 Hrs Yoga Alliance Teacher. Nan ta un famia cu un rutina laboral y familiar dinamico y cuarentena a pone nan incorpora ambos. Nan ta bendiciona di ta na un pais cu ta permiti pa cumpli esaki. Na cas nan a prepara un camber cu nan a yama ‘quarantine fitness room’ caminda full famia por dedica na nan mesun rutina.
Segun Yohana si nos acepta e cambio den nos bida awor, unda nos mester keda cas den cuarentena, e lo yuda nos haya un miho resultado como un pueblo disciplina y consciente. Asina nos lo por combati e situacion genera pa e pandemia global di coronavirus. Pa Yohana como comerciante esaki ta un oportunidad pa bira innovativo, aportando ayudo na nos comunidad. Mester ta prepara pa ‘profit and loss’, e responsabilidad y estabilidad di e ekipo. Nos ta experenciando un impacto social y financiero grandi pa full nos comunidad.
Su pensamento ta cu COVID-19 a confirma nos comunidad mundialmente, cu nos mester cuida otro manera ruman sin importa religion, nacionalidad, politica of status social. Nos mester inverti den nos salud publico y tambe promove e cuido di nos fauna y nos naturalesa. Pa reduci e consumo di carni animal si no kier elimina completo for di nos alimentacion. Yohana ta mantene su mes positivo durante e crisis aki teniendo un balance di noticia profesional estableci pa nos Gobierno. El a minimalisa uzo di social media, disfruta tempo cu su famia, mantente su rutina di ehercicio na cas, lesa y devocion spiritual door di meditacion. Gratitud ora nos no por bay pafo y nos por bay pa den di nos mes.
