DEMIS ILLES

Demis Illes ta bin di un famia ‘mengelmoes’ manera e mes ta describi. Su descentientenan pa banda di tata ta di Corsou (Curie) y Suriname (Illes). Pa banda su mama, su descendientenan cerca ta di Aruba (Almary y Faro), pero Demis a compronde cu nan tin un link cu Europa y Cuba. Den transcurso di su estudio el a conoce varios abogado cu e ta considera como su rol model di inspiracion. Door di wak otro y copia e cosnan bon, uno por logra un estilo unico y na e forma corecto. Pues na caminda Demis a crea un propio estilo di pleita, uzando e puntonan fuerte di cada inspiracion. E caso di IBIS sigur ta uno cu a habri su wowonan pa y di cual el a gana hopi mas experencia. Ta di e forma aki crecemento profesional ta tuma luga.

Demis mes a nace na Hulanda 26 di januari na aña 1981. No mucho tempo despues nan a bin biba na Aruba y net cu el a cuminsa bay scol basico na Aruba, nan a bolbe bay biba na Hulanda. E aventura aki a sosode algun biaha, pues e tabata muda regularmente entre Aruba cu Hulanda.

Como mucha, Demis a bishita diferente scol, experenciando asina cada biaha un otro sistema. Esaki a contribui na su preparacion inconscientemente, dia ta e persona cu e ta awe, como profesional, pero tambe den su bida personal.

Segun Demis na Aruba bida ta mas trankil. Esaki sigur e por conclui despues di a experiencia bida diferente momento na Hulanda. Desde cu el a caba su estudio y a muda pa Aruba bek na 2007,  el a logra stabilisa un bida cu su famia aki mes. Aruba ta sin duda ‘my place to be’. Demis ta echt mas un ‘island guy’ cu un ‘city guy’ y ta prefera lag’e cu su short y bodyshirt.

Bo nomber ta hopi apart. Kico bo por conta di origen di esaki?

Segun mi mayornan a conta mi, mi mester a wordo yama “William” door di tradicion di famia. Mi abuelo (q.e.p.d.) y mi tata (q.e.p.d.) tin e nomber ey. Pues mi tata tambe tabata kier pa ami carga “William”. Mi mama sinembargo, no kier a continua e tradicion y tabata haya e nomber uno ‘ouderwets’. Cu su ‘veto’ el a nenga di acepta e nomber William. Durante aña 80, den e periodo di embaraso, mi mayornan tabata na Hulanda y a atende un concierto di Demis Roussos, cu ta un artista Griego. Mi ta asumi cu nan a keda asina impresiona cu e artista, cu di eynan a scoge e nomber. Esey ta loke mi sa di e origen di mi nomber.

Dicon of kico a pone bo studia abogacia? Y kico ta bo specialidad?

Terminando mi carera escolar na Colegio Arubano, mi a haci un ‘beroepskeuze test’. For di e test aki a sali afo cu mi tin afinidad, pa cu e aspectonan relata cu husticia y ley. Finalisando mi VWO  m’a contempla pa bira inspector di polis. Mi a hasta papia den e tempo ey cu comisario Van der Straten. Sinembargo, e oportunidad ey no a presenta pa mi persona. Cu mi por corda y cu mi por a compronde, basta hende a wordo manda e tempo ey Appeldoorn pa Academia Policial. Ami a scoge e ora pa studia ley. Como cu mi no kier a keda Aruba, mi a bay Hulanda pa sigui cu mi estudio.

Ki tempo y unda b’a studia y kico tabata bo tesis final?

M’a studia di 2001 pa 2006 na Tilburg Hulanda y a atende Katholieke Universiteit Brabant (KUB), awo conoci como University of Tilburg. Durante mi trayectoria na KUB, mi a sinti mas afinidad cu ‘strafrecht’. P’esey cu mi a sigui tambe un programa special, cu ta mara na ley penal y a finalisa mi estudio specialisando den e ramo di strafrecht. E topico di mi tesis final tabata tin di haber cu “extradicion”.

Kico tabata e reto di mas grandi como un studiante di abogacia?

Sin duda, e idioma academico. Ley riba su mes ta skirbi na un forma basta complica y banda di esaki, bo ta topa cu e palabranan no usual, cu ta mara na e materia mes (‘jargon’ di e materia). Esaki sigur tabata un reto na cuminsamento. E idioma Hulandes, cu bo ta tende na scol aki na Aruba, ta totalmente diferente cu esun cu bo ta topa cu ne na un universidad. E nivel academico sigur ta notabel y ta exigi hopi esfuerso di e studiante pa ‘catch up’. Pero cu hopi lesamento bo ta logra. Despues di tempo bo ta custuma y ta automatisa e palabranan, cu un tempo tabata zona manera palabra grandi.

Ken ta bo rol model como abogado y dicon?

Durante mi estudio mi mester a atende algun audiencia den corte. Den e tempo ey mi por a experencia algun abogado Hulandes pleita, cual sigur a impresiona mi. Mi ta cuminsa na menciona mr. Bram Moszkowicz. A pesar cu e persona aki a haya su mes confronta cu algun problema, cual a haci cu e no mag di fungi mas como un abogado, no ta kita afo cu den su tempo Moszkowicz a mustra un ‘parate kennis’ enorme y tabatin e don di pleita cu conviccion. Mescos mi por menciona mr. Franken y mr. Spong. For di tur dos mi a haya algun les tambe durante mi estudio na KUB. Un señora abogado cu sigur ta impresionami tambe ta mr. Ficq.

Como rol model local ta e.o. mr. Chris Lejuez, mr. Pepi Sulvaran y un persona cu te dia di awe ta na mi banda ‘met raad en daad’ mr. David Kock. E personanan aki por desplega un conocemento enorme y tin alabes e don pa convence un otro. Sigur tin mas colega abogado local, cu a sirbi como role model na cuminsamento di mi carera y cu a hasta a yuda mi, p.e. mr. Lucy Peterson.

Kico bo ta pensa di nos leynan?

Nos ta cana poco atras. Pues tin un berdad den e ponencia di pueblo cu “nos leynan ta antigua”. Tin basta cos pa update, pero e proceso ta uno largo y cu ta tarda. Kisas pa falta di e cantidad di persona capacita pa haci e trabou. Pero mester bin cu solucion, pa evita cu nos ta keda core atras. Otro cos cu mi ta haya cu mester sosode ta un contextualisacion di e ley riba su mes. Hopi cos nos ta copia di Hulanda, sin tene cuenta cu e situacion local. No ta tur loke ta traha na Hulanda, necesariamente lo ta beneficioso pa nos. Pues un tiki mas empeño, pa adapta e ley (si ta necesario) na pensamento local, sigur lo ta na su lugar.

“Nos no mester bruha castigo minimo, cu e deseo pa e castigonan duna ta mas halto. A pesar cu mi no ta comparti e opinion, cu e castigonan duna na Aruba ta abou, mi por compronde e pensamento di un gran mayoria di e pueblo, cual mi ta respeta.”

Bo ta haya cu na Aruba mester bin cu castigo minimo, specialmente den caso di abuso di mucha/menor?

Sigur cu no y pa niun tipo di crimen. Mester duna un espacio na huez, pa por tene consideracion cu un motibo individual, cu por a hunga un rol den un situacion specifico. Si pone un castigo minimo e huez nunca por tin e libertad, pa tuma un decision cu ta tene na cuenta e circumstancia specifico individual (op maat gesneden). Castigo minimo por trece tambe un “averechtse werking” cu ne. E por haci cu un huez, cu tambe ta un hende, por haya e castigo minimo disproporcional, unda e ora e lo djis bay absolve e sospechoso.

Kico bo ta sugeri pa haci?

Mester drenta den un forma di dialogo, pa e deseo aki yega cerca esnan cu ta huzga y impone castigo. E ley riba su mes ta duna espacio pa e castigonan mas halto. Un ehempel: abuso di menor (verkrachting) ta papia di un castigo maximo di 12 aña. Tiki, pa no bisa nunca, a impone e castigo maximo aki riba un sospechoso. Pero e espacio pa haci esaki t’ey. Atrobe, den tur caso, mester tene cuenta cu e aspectonan individual y hopi biaha esey lo hunga un rol pa un castigo ta mas abou.

Kico segun bo, ta loke ta pone cu e hueznan ta duna castigo abou of niun castigo, den caso di abuso di mucha/menor?

Si ta trata aki di specificamente violacion, ya cu abuso por implica maltrato tambe, mi ta opina lo siguiente. E hueznan ta mara na e reglanan di ‘bewijsminimum’. Nos ley conoce un ‘bewijsminimum’, ora ta yega na e cantidad di prueba y tipo di prueba cu mester tin, pa por condena un persona. Y ta bon mes cu nos sistema conoce e tipo di ‘bewijsminimum’ aki, paso sino hopi manipulacion por tuma luga, cu sigur lo no beneficia husticia. Den e casonan di abuso di menor hopi biaha e ‘bewijsminimum’ no ta obteni of ta alcansa net net un minimo. Hopi biaha ta papia di falta di prueba of ta ripara cu e prueba no ta suficiente fuerte, pa convence cu a comete un maldad. Por ehempel, e victima ta bin dilanti hopi laat na e momento cu ya no por haya hopi prueba mas. E ta keda su palabra contra esun di e sospechoso, cu hopi biaha lo nenga.

Kico asina bo por duna como ehempel tocante prueba no suficiente solido?

Locual cu tambe ta hunga un rol grandi den e casonan asina ta, cu sa pasa mas tanto cu menornan, cu a constata cu nan no por relata un acontecimento bon. Nan mesun mente ta bay yena e cosnan (veronderstelling), cu na final lo no cuadra. E mente di hende y sigur di mucha ta traha asina. E ora bo ta haya e storianan contradictorio, cual ta kibra e declaracion bek. Esakinan ta djis un tiki di loke hopi biaha ta pasa. E pruebanan no ta resulta di ta solido suficiente, cual ta un motibo balido pa un huez hay’e obliga na absolve un sospechoso.

Ki ora pa bo, un abogado realmente ta gana su caso of perde su caso?

Aki mester distingui un caso civil for di un caso penal.

1- Den un caso civil, si bo ta e demandante bo lo gana, si huez duna bo rason y b’a haya loke b’a pidi. Si di lo contrario sosode, segun mi b’a perde. Si den e caso civil, bo ta e persona cu a wordo demanda, dus e acusado, bo lo a gana si bo a logra convence e huez pa rechasa e demanda of por lo menos b’a logra baha e demanda y controla e daño. Como abogado ta bo tarea, pa por analisa y purba haci un pronostico di cuanto e chens pa gana ta y a base di esey conseha bo cliente. Si e chens di perde ta mas grandi cu di gana, kisas ta na su luga pa hasta purba ‘settle’ un caso e ora, pa asina controla e daño haci. Hopi biaha e clientenan ta bati na porta di un abogado, ora cu ya e baca a hoga. Kiermen e ta sigur un arte pa e ora ey, bay evalua kico ta e mihor solucion, teniendo tur e circumstancianan na cuenta.

2- Den un caso penal, si bo logra convence huez cu bo cliente, e sospechoso, no ta culpabel y absolve, sigur b’a gana. Pero tambe si bo por logra convence un huez, pakico e rol di bo cliente ta otro y menos cu Ministerio Publico ta alega, y e haya un castigo mas abou cu ta posibel, ami ta considera cu na e momento ey b’a gana. Specialmente den e area penal, unda cu bo ta cuminsa bo caso cu un atraso. Paso si Ministerio Publico ta husto y no tin ningun prueba of niun indicacion cu e cliente ta culpabel, e caso no ta ‘suppose’ di a yega dilanti mesa berde mes.

Si Ministerio Publico pidi un castigo di prison y bo no logra saca bo cliente liber, pero si reduci e castigo, esey bo ta considera toch como un caso gana? Of perdi?

Un caso gana, manera m’a cab’i splica. N’e momento cu bo por convence huez, cu bo cliente no ta mes culpabel cu Ministerio Publico ta alega, of no tabata tin e rol cu Ministerio Publico ta pretende, pero uno menos y e castigo bin mas abou, mi ta kere cu como aboagdo b’a logra e meta principal y esey ta considera como un caso gana. Y sigur tin forma y e formulanan pa haci esaki!

Bo ta comparti e pensamento cu e abogadonan Hulandes y e hueznan Hulandes tin un miho relacion, vs un abogado local y un huez Hulandes?

Mi ta kere sigur e tin su bentaha, ora cu dos persona di e mesun origen ta comunica cu otro. Banda di idioma, door di e origen y afinidad cu otro, nan lo compronde otro miho, a base di e aspectonan contextual cu nan tin en comun. Sinembargo mi no tin motibo na duda cu nos hueznan ta profesional suficiente y sa di pone cualkier relacion un banda y huzga un caso riba su meritonan.

Kico bo ta gusta haci den bo tempo liber?

Netflix & Chill. Medita y sali/trip. Y teniendo na cuenta cu cada dia cu pasa, ta mas bieu nos ta bira, mi ta core, haci crossfit y train mas regular den mi tempo liber. Pero no cu esey ta cay bou e capa di “gusta haci” den tempo liber. E djis tin di haber cu e sindrome di ‘anti aging’.

Con bo ta wak bo mes aki 5 aña?

Eherciendo e mesun funcion. Mi ta gusta mi trabou y ta nota cu e ruta cu mi ta hibando ta esun corecto. Pues aki 5 aña mi ta wak mi mes ta haci e mesun funcion den un forma mas grandi. E trayecto aki ta canando caba y na su debido tempo, esaki lo wordo anuncia oficialmente. Pues keda pendiente.