Net 2 siman prome cu Roxana a haci 25 aña el a wordo confronta cu e malesa di cancer di pecho na 2010. Asina tambe el a bira e muher di mas jong (e tempo ey) na Aruba cu cancer di pecho registra. Roxana Effer tabata riba e portada di FOCUS di mei 2015 cu tabata un edicion dedica na Dia di Mama, unda el a conta cu loke tabata mas difícil p’e, cu e mester a enfrenta e malesa di cancer, ta ora cu su yiu grandi tabatin 4 aña y su cabeynan a cay. Su reaccion tabata asina inocente y incomprondibel y ta duro pa splica na e edad ey, kico tur ta pasando.
E di dos cancer a sali na e mesun pecho riba e cuero cu consecuencia cu mester a kita full e pecho banda links. Despues na 2016 atrobe Roxana a haye confronta un biaha mas cu cancer, y e biaha aki na su garganta, unda a saca 89 klier y gran parti di e musculonan di su nek. El a wordo opera aki mes cu Dr. Peterson y despues el a wordo manda Baranquilla, Colombia. Cu e intencion di haya bestraling y cuminsa di biaha cu chemo, pero a resulta cu e mester a bolbe wordo opera na Colombia y el a pasa casi 5 luna eynan. El a bay un tiki mas trankil paso ya Roxana tabata sa tur kico ta bin, pero e tabata un poco diferente paso cu garganta ta un otro proceso. E no por a drumi bon door cu e operacion tabata molestie y e mester a cana cu un drain na su nek durante un siman.
Hair & Makeup: ENVY by Clyde | Outfit: D Shop Aruba
Fotografo: Suhaila Alders | Localidad: FOCUS Studio
Roxana mester a bay tambe terapia pa nek, brasa y cara, paso ora el a wordo opera na Aruba mitar di su cara a bay den banda, esey tabata teribel p’e. Su wowo no tabata cera bon di un banda, su boca tambe e no por a hari drechi, pero despues el a siña kico tur e mester a haci cu su cara pa e logra haya un 90% bek. E distancia cu Roxana tabatin di su yiunan tabata dune mas forsa p’e recupera y bolbe Aruba. E ta gradici e tata di su yiunan y su ruman homber, cu a turna pa bay Colombia wak p’e. E ta gradici tambe su famia cu ta biba na Colombia, cu tabata bin turna tambe pa wak p’e y lanta su animo pa sigui.
“Como mama mi tin e temor pa mi yiunan no pasa den loke ami a pasa aden”
E bida di Roxana como mama ta keda un tarea dificil, pero no imposibel. Como hende muher tambe e ta haya dificil, den cierto etapa di bida, specialmente den su caso. Como mama e tin e temor pa su yiunan no pasa den loke el a pasa aden. Y como hende muher e ta sinti temor enorme, ora cu bo tin cu perde cierto parti di bo curpa y e sentimento mixto y temoroso. E tres caracteristicanan mas fuerte di Roxana como hende muher y mama: “Como mama mi ta streng y na mesun momento mi ta haci cos pret y mi ta hopi cariñoso y como hende muher mi ta flexibel, amoroso y un tiki mandona”. Na dos ocasion Roxana a sali den Revista FOCUS contando su experiencia como sobreviviente di cancer. El a haya hopi mensahe di hende muhernan cu tabata batayando cu e enfermedad, pidiendo conseho y palabranan di aliento.
Durante e añanan cu a pasa Roxana Effer a pone su mes pa haci tur loke e ta gusta. El a canta den gaita, modela y aña pasa el a competi pa Señora Carnaval, representando Infinity Carnaval Group. El a conta su storia tambe den programanan na radio y television, el a sali tambe riba e portada di revista Bacchanal y su potret ta grandi poni den Carnival Euphoria. Mientrastanto Roxana y su pareha a separa, sinembargo su bida ta sigui y ta feliz cu su yiunan. E ta sigui gradici Dios pa cada dia: “Dios no ta duna bo un cruz cu bo no por carga”.
