FLOR LACLÉ

Cinco aña pasa Flor Laclé a tuma e decision pa haci un cambio den su bida. El a ripara cu tempo bo mes ta defini, y el a traha tempo pa dedica na su mes lantando tur mainta dos ora prome, pa bay gym den un horario cu no ta interferi pa atende su yiunan, su casa y negoshi. A yega un momento cu training no tabata un sacrificio sino parti di su estilo di bida. Su deseo tabata unicamente pa sintie saludabel mental, emocional y físicamente, apart di su deseo di luci fantastico. Aworaki cu gym ta cera y mester keda cas, Flor ta continua su rutina di training na cas cu e mesun disciplina. Contrui hermentnan nobo na cas mes, cu ta yuda bo continua cu e unico cos cu ta haci bo liber di stress causa pa e cantidad di informacion negativo cu bo ta lesa y pa yuda bo mes sinti saludabel, positivo y cu bon humor cu ehercicio físico.

Creatividad awor ta hunga un rol importante pa satisface algun necesidad, cu no por realisa pafor di cas. Den e caso di Flor y su famia, ta na prome lugar e educacion online di su yiunan cu ta wordo haci bou supervision.  E ta busca fuentenan nobo di ingreso y ta comunica cu mas frecuencia cu famianan via video call. Nan a inclui tambe e yiunan pa haci ehercicio den famia pa reemplasa un poco di nan actividadnan deportivo cu nan tabatin pafo di cas. E punto positivo di e actual aislamento y limitacionnan cu nos ta bibando aden ta, cu nan ta pasando mas tempo compartiendo den famia. E aislamento a contribui na e sanacion di e planeta, loke ta obliga na conscientisa cu nos mester ta miho sernan humano y respeta nos ecosistema.

E sugerencia di Flor pa esunnan cu ta haci ehercicio den aire liber ta pa preferiblemente pa exercise na cas! Nos tin e obligacion pa contribui pa supera e pandemia aki. Sinembargo si bo gusta haci ehercicio den aire liber, ora bo ta core, cana, haci ciclismo of subi Hooiberg,  pa mantene un distancia di 4 meter minimo di e otro persona. E distancia di 1.50 no ta sigur pa practica deporte.

Cua ta e cambionan mas visibel den e comportacion di bo famia den e ultimo 4 simannan?  

Miho comunicacion, mas union y mas combersacion largo.

Como un di e hende muhernan cu a ricibi un reconocimonto como “Exemplary Women of Aruba’, ki ta bo mensahe?

Haci bo maximo esfuerso pa mantene union y harmonia den e circulo familiar. Union ta duna e forsa pa por soporta e etapa difícil aki, cu ta afecta e mundo y cu exitosamente tin su final.

Flor Laclé tin un recomendacion final; un reflexion segun su perspectiva: “Nos tin miedo di nos mes y no ta permiti pa wak den nos mes interior.  E bida agita diariamente tin nos atrapa y nos ta lubida di medita. Awor cu nos ta limita di libertad, nos por hacie. E custumber di wak pafo tabata mantene nos distrai.  Como cu awor nos no por ta pafo, nos tin cu wak paden, awor nos ta bin haya sa e famia maraviyoso cu nos tin, e  poderoso shelo blauw y solo maraviyoso. Y realisa cu nos tin nos mes. NO ta malo pa tin e autoestima halto y stima nos mes mas. Nos cada un tin e poder di transformacion, dicidi e cambio cu ta permiti nos evoluciona  y  ser miho persona.

Entrevista: Carlos Centeno