Su cara no ta uno desconoci. Hopi hende a mir’e, ora cu e tabata presenta noticia na television algun aña pasa, na Telearuba. Naline tabata e portada di FOCUS na september 2012. Despues di 8 aña, Naline ta bek como un empresario social y presentando un proyecto di cosmetico, unda e mester a specialisa su mes den e materia, pa asina yega na un producto final, cu por a haya acogida den comunidad. Su motivacion tabata grandi: su mama y su ruman, cu ta sufri di epilepsia y tin limitacion visual. Enfocando riba habilidad y no den limitacion, Naline a logra produci un habon 100% natural: Ha’ Bon Aruba.

Tur cos a cuminsa ora Naline a dicidi na 2015 di bay un vakantie ‘retreat’ den e seronan na Colombia. Eynan Naline a haya y experencia e pureza di naturaleza, con e hendenan ta conta unicamente cu e recurso cu naturalesa ta brinda nan. El a cuminsa wak e cosnan diferente, di un forma of otro su wowo a habri y curiosidad a lanta.

Naline cu su FOCUS Reconocimento 25 Aniversario

Kico ta e prome cos cu bo dicidi pa haci despues di e curiosidad?

Mi a cuminsa haci un investigacion relaciona cu e produccion di cosmetica. Mi a nota cu mayoria ta uza tur sorto di kimico y e ingredientenan artificial den scala grandi y cu te hasta ta haci test cu e animalnan. Claramente mi a compronde cu pa mi ta sigur, cu loke mi ta pone riba mi curpa mester ta totalmente natural, mi lo mester a hacie mi mes. Cu un tremendo mentor cu a encurasha mi, mi a cuminsa un estudio pa specialisa mi mes den e materia aki.

Kico bo por conta di e prome habonnan?

Bek na Aruba, mi tabata haci un par di habon 100% di olive oil. Esaki tabata pa mi mama y specialmente pa mi ruman Jasmin, cu ta un persona special, cu ta sufri di epilepsia y ta ciego. Mi a trah’e pa yud’e alivia e rash cu e ta haya di ta hopi riba cama.

Con bo a yega na bo prome cliente?

Durante un recepcion, un General Manager di un Tour Operator a puntra mi kico mi ta haciendo, y mi a cont’e cu mi ta trahando habon 100% natural. El a pidi mi reuni cu ne. El a duna mi conseho y sugerencia. Sin perde tempo mi a haci e cambionan y nan a bira mi prome cliente.

E RETO- Y OPORTUNIDADNAN

Kico tabata e reto di mas grandi pa inicia cu Ha’Bon Aruba?

Mi no por bisa cu tabata tin un reto grandi pa inicia cu Ha’Bon Aruba. Mi tabatin hende cu a guia mi y duna mi conseho.  Loke a hacie bay facil, ta cu mi a cuminsa na cas den scala chikito. Mi mes tabata haci practicamente tur cos. Mi a uza placa cu mi tabatin gespaar y esey tabata mi capital di trabou. Asina mi a cuminsa genera entrada cu mi a re-inverti, pa sigui cu e proceso di crecemento. Despues di a cumpra un par di ekipo pa aumenta mi produccion, mi a haya mi confronta, cu e echo cu mi mester di hende pa yuda mi.

Bo empleadonan ta persona cu limitacion, kico bo por conta di esaki?

Na momento cu mi tabatin mester di hende pa yuda mi, mi a topa cu un ‘job coach’ pa e personanan cu limitacion. E tabata enbusca di compania of organisacion, cu lo por a yuda pone e personanan aki na un trabou pa nan bira productivo. Esaki tabata un perfecto combinacion pa traha un producto 100% natural cu participacion di e personanan cu ta enbusca di un oportunidad asina. Awe Ha’Bon Aruba ta conta cu un team di persona cu limitacion y nan ‘job coach’.

Ki ta bo vision y mision?

Ta pa trece un liña di producto 100% natural cu por produci cu participacion di e personanan cu limitacion, cumpliendo cu loke pa mi ta un obligacion social. Mi mision ta pa organisa mi facilidad di produccion na un manera mas eficiente, cu por cumpli cu e demanda creciente.

Menciona un les di liderazgo cu bo a siña den bo carera?

Cu nos tin cu enfoca den nos habilidad y no den nos limitacion. Mi ta purba di saca e habilidad di mi e miembronan di mi team, cu despues nan ta sinti contento cu e responsabilidad di nan tarea y na final nos ta haya un producto di calidad traha cu amor y dedicacion.

“Mi vision ta pa trece un liña di producto 100% natural cu por produci cu participacion di e personanan cu limitacion!”

Si bo tin un conseho pa un persona cu a caba di cuminsa negoshi, cua esaki lo ta?

E mester ta 100% comprometi y no laga un caida desmotiva bo. Lanta para, coregi loke a tumba bo y sigui!

Riba e dianan dificil, kico ta motiva bo pa lanta pa cuminsa e dia?

Sa cu mi ta bendiciona, cu mi tin mi bista cu mi por wak, mientras cu tin hopi hende cu ta ciego, manera mi ruman mayor. Di sa cu mi tin pia pa lanta para, mientras tin hopi hende cu no por move y ta depende di otro pa por move. Di sa cu mi tin dos man pa mi traha. Mi tin e deber y obligacion pa aporta, pa un miho bida y miho mundo dia pa dia.

UN HENDE MUHER BENDICIONA Y SATISFECHO

Na kico ta atribui e exito di Naline Heilbron?

Mi dedicacion y mi sacrificio. Sin lubida e dedicacion di mi team.

Con tabata e transicion di media pa ‘social entrepreneur’?

Media tabata hopi interesante y mi a siña hopi, pero mi a sinti cu e no tabata algo, cu lo mi kier a haci resto di mi bida.

Con bo ta sinti como un hende muher cu ta influencia?

Mi ta spera di por ta un bon ehempel pa otro hende muher.

Cu cua palabra(nan) bo ta defini bo bida te cu awor?

Bendiciona y satisfecho.

“Media tabata hopi interesante y mi a siña hopi, pero mi a sinti, cu e no tabata algo cu lo mi kier a haci resto di mi bida!”

Si bo por tin un super poder, cua e lo ta y dicon? 

Trece entendimento den humanidad, pasobra tanto na Aruba como resto di mundo ta yen di polemica, cu ta hibando e pueblonan den violencia contra di otro.

Cua ta un tentacion cu bo no por resisti?

Un atardi den mi hamaca cu un dushi papaya di mi hardin, acompaña pa un glas di Prosecco y tur mi cachonan rond di mi.

Si bo por ta un personahe mundial pa un dia, ken e lo ta dicon?

Mi tin hopi admiracion pa varios personahe mundial, pero mi no lo kier perde un dia di ta mi mes. Mi ta kere nos tur ta un personahe unico y cu un proposito unico. Ningun hende por copia otro, of haci otro su idea. E djis lo ta mesun cos.

LEAVE A REPLY

Please enter your comment!
Please enter your name here