E entrepreneur y estilista profesional di The Salon, Roberto Avalo, ta un persona hopi protocolar y bon organisa. Su dia ta completamente planea prome cu e cuminsa, p’esey e ta gusta traha cu un agenda, cu tur su citanan na ordo y cu tempo prudente pa por cumpli cabalmente. Prome cu e crisis di coronavirus su dia tabata start pa 7’or di mainta y e ta yega na The Salon pa 8’or, y e no tabatin un horario di salida. E cambionan di look ta algo cu Roberto ta ehecuta cu hopi pasion y e ta inverti 100% di su mes pa cada cliente keda fabuloso. Basicamente henter su dia ta draai rond di esaki den e salon. Ya pa finalisa e ta disfruta di e resto di dia hunto cu su casa na cas, cushinando y compartiendo un bon pelicula of ta wak noticianan tanto local como internacional den ambiente familiar. Roberto den su tempo liber na cas a realisa un video cu tips con pa mantene bo cabey saludabel durante ‘shelter in place’!
IMPACTO DI E CRISIS
E impacto di e crisis di COVID-19, e ta defini di e mesun manera den tur 3 aspecto tanto empresarial como familiar y personal. A pesar di considera esaki tambe como un tempo di reflexion y pa redefini obhetivonan cla, pa por continua unabes cu surpasa e crisis aki. E ta kere firmemente cu e aspecto di mas crucial ta e debilitacion tanto emocional como den e aspecto economico, cu a bira e realidad di hopi hende na Aruba y di mes tambe e comerciantenan. E efecto di e crisis a trece dilanti e mesun necesidad pa tur hende. Mester bay reinventa bo mes, reinventa bo negoshi y reinventa bo balor pa por surpasa tur esaki victorioso. Roberto ta kere cu e mas importante actualmente ta pa trece solucion y no lamento.
PLAN PA SIGUI DILANTI
“Mi ta kere despues di e ciere di e salonnan di beyesa, nos plan di accion a bira un obhetivo a corto plazo. Nos tin un conocemento infinito cu por engrandece nos calidad di servicio y tur esaki ta posibel danki na educacion y na inverti tempo di calidad den bo mes y bo talentonan. Un plan di accion sin estudio no tin forsa, e ta carece di e fundeshi solido pa por sostene cualkier iniciativa. P’esey nos ta trahando na cas riba nos mes, riba nos mehoracion profesional a traves di seminarionan online y creando contenido pa nos comunidad”.
TA LAMENTA CU UN ESTILISTA A CONTAGIA CU E VIRUS
Despues cu Roberto a documenta su mes riba e topico di COVID-19, el a conclui cu e paisnan cu a tuma e medidanan mas extremo rond di mundo, a logra disminui e propagacion di e coronavirus. A base di esaki e ta defini e protocol di Aruba como uno efectivo y na su lugar. Su opinion tocante e anuncio DVG referente e caso di Secretos Beauty Salon ta, cu nos ta den un temporada caminda e union y fraternidad ta bal hopi. P’esey ta importante compronde cu anan como profesionalnan di beyesa nan obhetivo no ta otro cu ‘spread’ felicidad, bunitesa y amor pa nos comunidad. Lamentablemente un di e profesionalnan di beyesa no a scapa di e realidad aki (COVID-19), pero ta importante pa corda cu awe ta un di nan, pero cu mayan kizas lo por ta abo. Roberto ta sigui bisa cu e por tabata doño di un supermercado of personal di un botica, ya cu esaki ta un virus cu no ta discrimina bo profesion. Considera e suceso aki como un luz negativo riba e salonnan di beyesa, ta aparta nos como comunidad pero mas ainda como ser humano.
CON TA MANTENE SU MES POSITIVO
“Descansando, tumando e momento aki como tempo di crea, di acerca esnan cu bo a aparta di nan pa cualkier motibo. Dunando un gran Danki na Dios tata cu tur cos por. Y cu a pone nos dilanti un prueba di Fe, Forsa y Union como famia. Keda positivo ta e ‘certeza’ cu lo tin un miho mayan”.
