Como Store- y Counter Manager di Parbel, Angelica Rojas, prome cu e crisis di coronavirus tabata dedica su tempo na su trabou den e mundo di beyesa na Penha Aruba. E ta planifica y tambe ta motiva su team pa duna e miho servicio na nan clientenan. E contacto directo cu e clientenan cu ta drenta e tienda na Plaza Daniel Leo, cu ta varia for di e turistanan di crucero y esunnan cu ta hospeda na e hotelnan como tambe nos hendenan local, a crea un situacion cu no tabata facil pa anda cu ne, p’esey e prome medida di parti di Penha tabata pa cera e tienda na Palm Beach Plaza y despues baha e horario na Playa pa finalmente cera e tiendanan.

Ki impacto COVID-19 a causa den bo bida y plannan?

Hopi preocupacion pa tur locual mundo completo ta pasando den dje. Nos mester prepara con pa anda cu e situacion y efecto di salud. Tur e situacion ta obliga nos pa reflexiona, no solamente pa e salud  fisico pero tambe salud mental. Distanciamento social ta pone cu e hendenan ta bira mas solidario cu otro y cuida nos mes mas.

“Cu fe y perseverancia nos ta sali dilanti di henter e situacion aki”.

Con bo rutina diario a cambia awor cu bo no ta trahando?

E ta necesario den e crisis aki pa bira creativo pa no trece ansiedad cu efecto secundario. Mi ta practica mi hobby preferi cu ta coremento, tambe mi ta lesa buki, haci ehercicio na cas y cushina. Den hopi hende tin e miedo pa contagia y p’esey ta importante pa sigui e reglanan stipula pa Gobierno di Aruba, cu ta haciendo nan maximo esfuerso pa preveni nos comunidad di wordo contagia cu e coronavirus, cu ya a mata masha hopi hende mundialmente.

Con bo ta mantene positivo den e crisis aki?

Mi ta probecha e momento aki pa reflexiona, saca tur cos positivo di e crisis y wak semper e banda positivo. Nos tin menos contaminacion, e hendenan ta haci actonan di bondad y oportunidad pa creatividad. Mi ta haci uzo di mi tempo pa haci cosnan cu mi no tabata haci prome door di e bida druk. Nos tin e bendicion di biba riba Aruba cu ta un isla bendiciona. Cu fe y perseverancia nos ta sali dilanti di henter e situacion aki.