Como empresario Jacinto mester a acepta cu trabou a para obligatoriamente y no ta ‘business as usual’. E empleadonan di Cuts & Curves mester a bay cas y e no por a priminti nan cu mayan ta topa bek na trabou. Prome cu e crisis di coronavirus COVID-19, cu e rutina diario a cambia completamente, Jacinto como tata di dos yiu chikito (3 aña y 1 aña) tabatin e reto pa maneha dos localidad. Alabes preparando den e ultimo tres añanan pa un reto nobo y grandi, cual ta pa habri un localidad nobo pabou di brug. Hopi reunion, hopi planeamento y hopi obstaculo. Sin duda, tur esaki ta locual semper Jacinto a gusta haci. Esta semper reta su mes y kere cu semper tin un solucion pa tur cos.
E crisis actual aki a crea un desbalance completo den su bida. Proyecto cu tanto el a lucha p’e mester wordo poni ‘on-hold’ y dos localidad cera obligatoriamente cu no por ta accesibel pa niun hende, ta haci e situacion aun mas dificil. Locual ta di remarca ta, cu e tin mas tempo liber pa dedica na cas cu su pareha y su dos yiunan. El a siña tambe cushina platonan nobo y hunga weganan bieu.
“Lo sigui semper cu e metodo cu a custuma cu ne”
Ki ta bo opinion di e forma con Aruba ta atende cu e coronavirus crisis?
COVID-19 ta algo nobo pa tur hende. Aruba y ningun pais rond mundo no tabata cla pa esaki, y mi ta consciente cu gobierno ta haciendo su maximo esfuerso pa conscientisa e comunidad en general. Nos tur mester mantene nos mes na distancia di otro y mi ta kere esaki lo ta entre e demas solucionnan pa elimina e virus aki.
Con e idea a surgi pa haci e donacion na KPA?
Cuts & Curves ta hopi agradecido na Cuerpo Policial, cu ta pone nan bida personal na riesgo pa proteha e comunidad en general. P’esey nos a kies pa haci un donacion na Cuerpo Policial
APP CUTS & CURVES
Unabes cu e situacion aki calma y Cuts & Curves ricibi autorisacion di gobierno cu por cuminsa opera bek, Cuts & Curves lo sigui semper cu e metodo cu a custuma cu ne, cual ta di duna e mihor servicio posibel y mantene facilidadnan limpi y higienico. Cuts & Curves ta un fitness center cu semper lo pone su miembronan na prome lugar y semper lo sigui introduci e ultimo trends den e mundo di fitness. Actualmente nan miembronan tin accesibilidad na nan aplicacion di Smartphone y por sigui esaki pa keda informa den nan proximo pasonan. Nan por tambe sigui e ‘home workouts’ diseña specialmente pa e temporada dificil aki cu nos ta aden. Por haya e link pa download e app riba e Facebook page di Cuts and Curves. Pa awor Jacinto Rasmijn su conseho ta pa keda cas y probecha di dedica tempo na bo famia y si mester sali, mantene distancia y proteha bo mes na tur momento.
