E cancion ‘Go Back’ ta den e genero musical di R&B y e letranan ta un combinacion di ingles y spaño. E artista Veronica Pichardo personalmente ta haya cu e combinacion aki a trece un dimension nobo den e estilo di e cantica. E tin hopi famia na Republica Domicana y e tabata kier a incorpora su sanger latino den e single aki tambe. ‘Go Back’ a wordo graba ora e tabata na Hulanda pa traha den studio cu diferente producer y tambe graba varios videoclip.
E cantica tabata inspira pa cierto eventonan cu el a pasa den su bida cu relacion cu e tabata aden. Veronica a realisa cu hopi biaha den un relacion e focus por kita for di e temponan bon, cu bo tin cu un persona hopi lihe. Esaki por pasa si tin temponan duro cu por hacie facil pa lubida tur e temponan bon. “Go Back” ta significa literalmente “Bay Bek”. Cu esaki el a interpreta e palabranan aki pa “Bay Bek” den tempo ora tur cos tabata bon y contento den e relacion.
E videoclip di su cantica tabata graba na Aruba hunto cu e team di Lino Ogenio, Michael Fowler y Elaivisuals. E clip ta conta un historia di amor di dos persona cu tabata realmente feliz, pero despues di tempo cos a cuminsa bay malo. Cu e pareha a cuminsa perde loke den cuminsamento nan tabatin. Veronica ta hopi contento con e video a sali paso e tabata exactamente loke el a pasa aden, y loke e ta kere cu hopi pareha ta pasa aden. E videoclip a wordu lansa riba su canal di YouTube: Veronica Pichardo y e cantica lo ta obtenibel riba spotify, deezer, apple music y hopi mas. Veronica ta spera cu tur hende disfruta di e cancion y videoclip “Go Back”.
