Den un entrevista spontaneo y diferente pa edicion di revista FOCUS di mei 2019, Rebecca a haci en serie di pregunta na su mama, Mary Spellen. Como e unico yiu di Mary Spellen, cu ta eherciendo orguyosamente tres profesion, cu semper el a soña cu ne: un muher profesional, mama y casa. Mary ta e ‘managing director’ di Discovery Travel y no ta un tarea facil di eherce band’i tur su otro trabounan. Tin hopi reto, specialmente ora e kier dedica mayoria di su tempo na cada un di nan, sin lubida tempo pa su mes. Na prome lugar e tin Dios, despues amor y un bon planificacion. Mary ta duna e prioridad cu cada un merece, cu e seriedad, responsabilidad y dedicacion pa por logra realisa tur tres. E ta gradici su mama y tata pa e muher cu e ta awendia y pa tur cos cu nan a siñ’e.
“Pa ta un bon mama y un bon casa, no tin un buki cu nos por lesa y siña di dje, esaki ta un trabou cu cada dia nos ta siña di otro y trahando den team manteniendo un bon comunicacion y respet, ta haci cu nos por biba un bida mas facil”.
E noticia di mas bunita y mas spera den Mary su bida tabata ora el a busca su resultado di test di sanger y cu a resulta cu e ta positivo. Rebecca Spellen a nace dia 18 di augustus 1999. For di chikito Rebecca tabata un mucha muher cu hopi energia cu nunca por a sinta keto. Su mayornan a dicidi di pone den un deporte, pa asina e por saca tur su energia. Un di e deportenan aki a resulta di ta turnen, cu ta e deporte, unda Rebecca a crece aden den tur sentido. Un deporte cu a siñ’e hopi cos, entre otro; disciplina, pasenshi y con pa semper vence bo miedonan. Rebecca a logra su Havo-diploma 2 aña pasa y tin e meta su dilanti, pa bay studia psicologia na Hulanda, unda e lo kier sigui cu su deporte tambe. Rebecca ta un persona cu semper t’ey pa su ‘friends and family’. Y unabes cu Rebecca pone den su mente cu e kier haci algo, e ta percura pa e hacie y logra loke e kier.
Tempo mi tabata chikito, ki sport mami a pensa cu mi lo bay haci ora mi crece
Mi a pensa cu bo lo haci ‘extreme sports’, door cu bo no tabata wak e peligery tabata hopi liher y ‘hyper’ y no tabatin miedo di nada.
Cua ta e cos mas pret cu mi a yega di haci, ora mi tabata chikito?
Bo tabata gusta bisti mi sapato y cana rond di e cas.
Con a ricibi e noticia cu mami tabata na estado di mi?
Tabata e señora di e laboratorio cu a bisa mi, ora mi a bin busca e resultado di e test di sanger. El a bisa mi: “positivo”! Esey tabata e noticia di mas bunita y mas spera den mi bida.
Cua ta e cos mas fastioso cu mi tabata haci ora mi tabata chikito?
Cera e boca, ora cu bo no tabata kier a come.
Cua tabata e prome co’i hunga cu a cumpra pa mi?
Un maraca.
Cua potret di mi ta esun faborito di tur tempo?
Un potret cu mi gusta y ta recorda semper ta uno, unda bo a gana un premio pa come mas ice cream den un corto tempo. E cara di felicidad cu bo a come asina hopi y liher, ta loke mas tanto bo tabata gusta.
Cua ta e prome recuerdo di mi?
Un cuadra di spageti cu a traha na scol pa Dia di Mama. E tabata hopi bunita.
Tempo cu bo tabatin mi edad, bo tabata kier a haya yiu?
No, a mi tabata kier caba mi estudio prome y despues cuminsa disfruta bida, sali keiro y conoce mas di e mundo pa despues casa y haya yiu.
Ki tabata loke ta pone mi yora y hari mas ora mi tabata chikito?
Yora ora di bay come y hari ora mi tabata kishiki bo.
Ki programa di televison mi tabata gusta wak?
Bo tabata gusta wak e programa di Zwarte piet, e videonan di Tele Tubbies, Barny y ora a bira un tiki mas grandi tabata gusta Hanna Montana.
Bo a yega di perde mi den un lugar?
Si! Nos tabata na un Miami Zoo y nos a laga bo cu oma, mientras nos a bay cumpra e lunch, pero ora nos a bin bek cu e lunch bo no tabata t’ey. Oma a bisa cu bo a bin nos tras y nos a spanta asina hopi. Nos a cuminsa busca bo y danki Dios nos a haya bo den un ‘game room’, cu bo a topa prome cu a yega e restaurant.
Cua ta e prome pelicula cu a hiba mi wak na cinema?
Lion King.
Cua tabata mi peluche faborito?
E coleccion di Webkinz.
Ki buki pa mucha tabata lesa pa mi ora mi tabata chikito?
The Bible, Lion King, Barbie y diferente otro storia.
Cua palabra ta bin na bo mente ora scucha mi nomber?
Danki Dios pa e milagro y e bendicion cu Señor a duna mi.
Cua tabata e sabor di baby food cu mi tabata gusta mas?
Esun di fruta y special esun di appel!
Di Kico mi tabatin mas miedo ora mi tabata chikito?
E scuridad den camber, ora di bay drumi.
Cua ta e mihor parti di ta mi mama?
Ta bo mama ta un bendicion di Dios, ta un amor incondicional y ta felicidad. Ta un maraviyoso experiencia di nos dos a siña pareu, di por wak bo crece asina liher den bida. Nos tin cu ta agradecido, humilde y respetuoso. Semper mi lo t’ey pa bo, pa por guia y siña bo e bon caminda.
Mami ta contento con mi a resulta como yiu?
Si mi ta hopi contento y orguyoso di locual bo logra te awor aki y mi ta sigui duna bo e amor y sosten, pa por sigui y por logra cumpli bo metanan y bira un dama profesional.
“I did not give you the gift of life, life gave me the gift of you”
Hair & Makeup: ENVY by Clyde Fotografo: Suhaila Alders
