E bendicion di mas grandi cu un ser femenino por haya ta esun di un yiu. Celebrando ‘Dia di Mama’ mayan pa prome biaha nos tin e dos bunita mamanan; Maruta Sneek-Veeris y Katyuska Hessing. Cada un ta pertenece na diferente generacion, sinembargo ambos ta celebrando felizmente e dia special aki hunto cu nan yiu y pareha. Baby ta keda nificacion di bida nobo, bendicion na abundancia y alegria sin fin den cualkier hogar y un ser humano cu abo como mayor tin oportunidad pa forma segun bo norma- y balornan, creencia, tradicion, principio y amor.
COMPASION UN PA OTRO
Nomber di mama: Maruta M Veeris- Sneek
Nomber di tata: Frank R Sneek
Nomber di baby: Justin-Isaac Frank Jr Sneek
Fecha di nacemento: 25 juni 2019
Con a pasa na cas mientras tabatin ‘shelter in place’?
Aunke cu hopi ta esunnan cu ta wak nan libertad di haci of dicidi a wordo limita, mas cu esey e ta un momento pa para keto un rato y mira con fragil bida ta! Con algo asina chikito cu bo ni por wak cu bo wowo por paralisa mundo completo.Esaki ta mustra nos cu mester balora tur cos maske con chikito of con poco e por ta, tin biaha hopi di nos ta tuma tur cos ‘for granted’ y ta lubida di balora y bisa danki pa locual nos tin.Shelter in place tambe a duna mi espacio pa conecta y pone mi sentimentonan y visionnan den arte, door di pinta riba canvas. Algo cu semper mi mester a busca tempo pa haci y asina comparti esaki cu famia y amistadnan, asina yuda duna un mensahe di ‘encourage’ pa tur esunnan cu por haci uzo di esaki.Shelter in place, laga nos mantene nos na e reglanan y keda conecta a traves di social media… Feliz Dia di Mama.
Con ta permira e bida normal nobo?
Mi ta mira e bida normal nobo cu hopi reto pa por determina e medidanan di preocupacion cu lo ta parti di nos bida diario nobo. Hopi ta esunnan cu lo mester reinventa nan mes pa asina crea espacionan nobo pa por sobrevivi y asina conbibi un cu otro.Importante ta pa nos por tin compasion un pa otro y corda conecta pa asina un por yuda otro.
Un mensahe
Mas cu bringa e virus di no plama, nos mester bringa e temor.Pasobra temor ta algo individual cu ta drenta y biba den nos curason, nos no mester permiti pa e drenta. Nos enfoke mester ta y keda cu nos ta un isla bendiciona y cu hunto nos lo supera e crisis aki.
BAN CUIDA NOS YIUNAN
Nomber di mama: Katyuska Hessing
Nomber di tata: Andrycg Rasmijn
Nomber di baby: Amilia Nicole Rasmijn
Fecha di nacemento: 05 augustus 2019
Con a pasa na cas mientras tabatin ‘shelter in place’?
Na cuminsamento tabata hopi dificil pa adapta nos mes na e regla di ‘shelter in place’, ya cu nos tabata custumbra di sali hopi cu Amilia y hibe unda cu nos bay.
Con ta premira e bida normal nobo?
E bida normal nobo ta uno cu hopi reto, ya cu ora bo tin un baby bo kier pa nan experiencia mas cos cu ta posibel y tambe wak cosnan nobo. Nos ta mirando con nos tin cu adapta nos mes pa asina purba di cuida mas cu nos por. Esaki ta encera menos salimento den publico y tambe hopi mas cautela ora cu mester sali.
Un mensahe:
Ban cuida nos yiunan, sin lubida cu nan tin necesidad na experiencia nobo pafor di cas, pero awo mas cu nunca cu hopi mas higiena, atencion y amor. ‘Stay safe and healthy!’
