Candy Rasmijn-Reino ta considera su mes un ‘Brand Activist’ den diferente area di politica cambiando e marca di corupcion den politica y educacion. E ta di opinion cu nos no por ta un marca sin conocimento di loke nos ta haci den e parti social, p’esey e kier comparti y yuda otronan bay dilanti. E ta cla pa e bida nobo despues di e temporada dificil di e crisis di coronavirus y ta convenci cu nos tur a cambia. E tin awor sigur hopi mas pa comparti y tambe e sa, cu nos ta mas habri pa ricibi e sistema digital, cu a obliga pa ‘re-brand’ nos mes.
Candy ta forma parti di diferente organisacion unda e ta yuda ekipa e hendenan den su area di experticio. WEN (We Empower Nations) Global foundation a nace na Aruba pa empodera y yuda crea oportunidadnan nobo a traves di educacion pa forma e negoshantenan di futuro. RED de Majores Lideres de Las Americas ta 250 muhe lider di diferente pais di mundo cu ta activistanan politico, cu nan compromiso ta pa empodera y crea muhenan di liderazgo. American Marketing Associations cu tasemper on top di conocimento den e era digital pa asina por imparti e conocimento na otronan.
UN PILAR FUNDAMENTAL
Na Aruba Candy ta hopi activo tambe y el a realisa tres proyecto hopi interesante. E prome tabata ‘Latinos Exitosos”, cu ta un proyecto cu a wordo crea pa educa e comunidad Latino na Aruba, y tambe na diferente pais pa nan comberti den lidernan den nan trabou of si nan kier haci proyectonan di entrepreneurship. E prome nan a haci na Kamer van Koophandel prome cu e pandemia. E proyecto “Café con Proposito” unda ta bebe un koffie y comparti cosnan real cu e hende muhe ta biba den su bida diario y esaki ta unicamento online. Candy a coopera cu Sede Aruba pa duna tips con pa reinventa bo mes y tambe cu Noticia e-arubiano news tip. Na tur organisacion cu e ta brinda su cooperacion mester tin como meta final: inclusion, educacion, comparti, conecta y crea networking.
E portada di FOCUS augustus aña pasa, a ilustra Candy Rasmijn-Reino den su campaña politico pa e alcalde di e ciudad di Magangué na Colombia. E pregunta si e ta bek na Aruba definitivamente of lo bolbe Mangagué, el a contesta:” “Mi ta kere esaki ta un pregunta hopi dificil pa contesta na e momentonan aki, pero un cos mi por bisa ta cu mi ta sigui yuda Magangué, y tambe Aruba cu mi conocimento y tur loke nos por aporta na e temporada aki”.
El a sigui bisa cu el a siña hopi di e experiencia aki, y e porta aki no ta cera ainda! El a haci un trabou cu excelencia y lo mas importante ta, cu el a laga su marca personal atras. E ta yudando den barionan cu e proyectonan pa yuda den e parti di educacion na su ciudad.
Ki tabata e miho experiencia?
Cu mi a conoce hopi mas di mi hendenan di nan necesidad, pero tambe mi por a constata cu educacion ta un pilar fundamental den tur sociedad. Mi lo sigui traha pa cu esaki bira realidad na mi ciudad.
MIEDO Y ANSIEDAD
E impacto di COVID-19 na prome momento tabata cu Candy a drenta den un momento di miedo y hopi ansiedad. E no tabata sa kico tabata sperando nos pa futuro. Como profesional e tabatin varios conferencia pa duna na Mexico y uno na Colombia. Esakinan a cancela y eynan el a cuminsa haya atacanan di ansiedad cu a bay asina leu cu asta el a perde rosea. Na e momento ey, Candy a realisa cu e mester cuminsa tuma accion pa por saca lo maximo di esaki. El a bay den e di dos fase, cu tabata siña di e temporada y cuminsa wak kico ta e cosnan cu e gusta y cu e por a haci na cas. Asina tambe el a cuminsa traha un rutina pa cas pa siña y reinventa su mes. El a tuma training den su areanan specifico educando su mes di tur e cambionan.
Den su tercer fase el a bay na comparti conocimento cu otro lidernan. El a cuminsa duna apoyo na e compania- y iniciativanan nobo dunando nan conseho den marketing y branding, y con pa reinventa nan mes y con pa bay den comercio digital, y e manera nobo di bende. Candy a cuminsa yama tur e otro lidernan den diferente area y diferente pais. Nan tabata haci programanan live riba instagram despues di rueda di prensa di gobierno. Nan a papia di topiconan manera: Salud mental, liderazgo en el tiempo de crisis, comunicacion & Marketing y branding. Candy a invita Lucy Perez di Mexico (Con lidernan ta maneha crisis) – Johanna Stroo di Aruba (Salud Mental) – Paola Mejia di Colombia (Como utilizar las herramientas de comunicación) –Miri Rodriguez di USA Microsoft (Con nos por yega na e curason di e clientenan a traves di storytelling). Pronto Candy conhuntamente cu WEN Foundation y FOCUS lo presenta un Serie LIVE riba facebook page di e revista. Keda pendiente pa e diferente temanan cu e expertonan riba cada area, cu lo bay LIVE pa comparti nan conocimento!
