Rossini na su trabou na hotel
Un di e impactonan grandi pa e carnavalista y ex-modelo, Rossini van Wijk, tabata cu e mester a celebra su cumpleaño online via Zoom. E sentimento tabata hopi special pa mira con su hendenan a bishite y celebra di e manera aki durante e pandemia. Como un persona hopi detayista tabata di spera, cu e lo decora su cas estilo Victoriano pa su fiesta virtual riba Dia di Rey. Rossini ta biba desde aña 2002 na Hulanda, unda e ta traha ‘on-hours’ na front office di un hotel mientras den su ‘off-hours’ e ta traha cu reina di beyesa, modelo, dunando les di pasarela y protocol entre su actividadnan.
Victorian B-Day
Miss Planet Aruba 2020: Angelique van Varsseveld pa Vicky’s Foundation
Otro talento artistico di Rossini ta e trahenan nacional espectacular cu e ta confecciona y cu a yega di gana diferente premio den certamennan di beyesa internacional. Debi na e coronavirus crisis hopi di e trahenan nacional a bay ‘on hold’, ademas mester a cancela hopi evento cu e mester a atende. Mientras e casonan di contagio di COVID-19 tabata aumenta, e tabata bira hopi nervioso, y tabata yama tur su hendenan cada momento pa ta sigur cu nan ta bon. Cu Rossini su estilo peculiar el a expresa: “Bo no sa kico pa spera, bo no sa ken, kico, unda! Tabata un tempo hopi straño y mi tabata super contento ora cu mi trabou a cera! Bo tabata tende di e situacionnan na otro paisnan, etc. Na ultimo mi no kier a tende nada mas, pasobra mi tabata bira nervioso. Mi tabata laba mi man asina hopi cu Pontius Pilatus lo a keda kens band’i mi”.
Rossini a cuminsa plata Rosa den su hardin
Rossini a haya hopi dia liber y mientras e tabata na cas el a haya tempo pa siña cushina. E ta asina orguyoso cu awor e por prepara 5 plato! Platonan dushi cu a agrega un extra peso na su personalidad manera cu e ta describi e parti aki ? Otro actividad cu el a cuminsa dedica na dje ta na planta rosa den su hardin: “Y nan ta growing strong. Nan ta asina bunita y ta corda mi na Mama, cu semper tabatin su hardin yen yen di rosa. Memories”.
Den e parti profesional no ta solamente e trahenan nacional cu a bay ‘on hold’ pero tambe 2 certamen di beyesa, su biahe pa Paris, Zomercarnaval, Gaypride, Nottinghill Carnival y 3 evento Victoriano. Esaki tabata actividad- y eventonan cu e tabata look forward to cu hopi smak mes! Sinembargo di biaha tambe e ta realisa cu no ta posibel den circumstancianan actual, y cu ta pa su mes salud y pa salud di tanto otronan. E efecto mas grandi pa Rossini ta cu e ta mira cu den 2020 NO por planea nada, paso bo nunca sa si ta bin un di dos pandemia of e efecto-/ consecuencianan di e prome, cu nos ta bibando aden actualmente.
Na cas durante e coronavirus crisis
Con e ta pensa di adapta na e bida nobo despues di e pandemia aki, Rossini ta bisa: “Awel, mester cuida curpa na tur ora! No solamente pa bo mes persona, pero pa otronan tambe! Bisti facemask, laba man, tene social distance, vooral di bo ex ?!… Pero e Covid19 aki a bin pa keda! Pues mester siña biba cu ne! Ami mes lo purba haci tur e cosnan cu mi mester y e cosnan cu mi ta gusta haci, cu cierto cambionan. Ta djis un otro moda di biba”.
Su mensahe ta pa tur hende cuida nan curpa, tanto pa bo mes como pa otronan tambe! E kier corda tur hende un biaha mas cu e COVID-19 aki a bin pa keda, y te ora cu no tin vacuna, nos mester tene esaki na cuenta 24/7! Cu nos no mester ta irresponsabel y pa no haci di mas. Pa corda balora bo hendenan, nos isla Aruba, duna atencion, respet, amor y cariño semper, paso esakinan ta cosnan importante den bida y finalmente e ta manda hopi Bendicion!
