Un cancion den e genero di reggaeton cu un ‘vibe’ hopi tropical, cual a ser graba algun luna pasa na Miami, a keda comparti cu mundo completo diahuebs riba e dia di su lansamento. Ta trata di un cancion composita pa Jeon y produci pa ‘Jhon Paul ‘El Increible’. E cancion cu tin e titulo ‘Se Va’ ta di e conocido artistanan; Tito el Bambino hunto cu Farruko. Tito el Bambino no ta un desconoci den e mundo Urbano, unda cu el a sa di cosecha hopi exito. El a tuma un break pa un temporada pero recientemente a haci un introduccion bek den e mundo di farandula. Naturalmente Farruko tambe ta un artista respeta cu un sin fin di exito.
Pa Jeon e tabata un placer di por a traha e cancion aki, pa asina sigui haci Aruba orguyoso di por tin un yiu di tera cu ta produci pa artistanan di taya. Proximamente mundo lo cera conoci cu un otro tema internacional cu Jeon a composita. Tambe Jeon y su ekipo ta trahando riba e ultimo detayenan pa asina lansa su proximo Album. E exito nobo ‘Se Va’ interpreta pa Tito el Bambino y Farruko ta disponibel riba youtube cu un tremendo videoclip. Tambe por cumpra of stream e cancion via Spotify, Apple Music, Deezer y Tidal.
