Cosecha su webshop a bay oficialmente online pa e mercado local. Cu e webshop aki, Cosecha ta brinda un servicio pa e clientenan cu kier cumpra Artesania y Arte Local cu Seyo Nacional di Artesania via e plataforma online. Riba Cosecha su webshop tin un surtido amplio y diverso di e piesanan certifica, cu ta wordo traha na Aruba door di artesanonan y artistanan local.
Mirando e situacion actual di COVID-19 unda cu e mundo online a haya un rol mas prominente, Cosecha a encamina cierto proyectonan na comienso di e situacion nobo. Un di esaki ta introduccion di un webshop cu por facilita aun mas e experiencia di compra pa cliente di Cosecha.
Door di introduci un webshop, Cosecha ta extende su servicio pa cliente pa asina awor por cumpra Artesania y Arte local no solamente na tienda situa na Oranjestad, pero tambe via nan webshop. Na un manera safe y facil, clientenan por cumpra piesanan unico y autentico riba nan webshop. E webshop aki por encontra na e tab: shop riba nan website di Cosecha: www.arubacosecha.com
Cosecha ta colabora cu 77 artesano y artista local y gran seleccion di e piesanan certifica den tienda ta riba nan webshop tambe. Cu mira pa futuro, Cosecha ta sigui desaroya su mes pa asina brinda mas servicio online posibel, unda lo por cumpra workshops creativo y DIYs via nan webshop. Tambe lo habri dentro di poco pa e mercado internacional pa asina por cumpra piesanan local certifica y exporta tambe e piesanan aki. Esaki lo ta un logro grandi cu nos localnan tambe por exporta nan piesanan pa e mercado internacional asina director di Cosecha, Joanne Dirksz, ta comenta.
Recordatorio pa publico en general cu Cosecha su tienda na Oranjestad a habri bek recientemente teniendo cuenta cu tur e normanan nobo di COVID-19. Por bishita e Facebook page di Cosecha: www.facebook.com/Aruba-Cosecha.
