Durante 15 aña Parwien Asgarali a biba na Aruba y el a siña tanto papia como skirbi Papiamento siguiendo les, y semper e tabata pidi su amistadnan pa comunica cu ne den nos idioma. Awendia e por expresa cu perfeccion den Papiamento, cual sigur ta di aprecia con e por domina nos idioma. Den comienso e tabata hopi dificil door cu Parwien nunca a bin Aruba y no tabata conoce hopi hende. Poco poco el a bay ta cera conoci cu mas hende y e ta bisa: “Dios a manda mi amistadnan cu a bira mi famia”. Su personalidad y su energia positivo ta haci cu e ta un persona cu por conecta facilmente den e bida social.

Na aña 2013 el a bay bek Hulanda unda e tabata biba antes tempo cu el a sali for di Surnam. E platonan tipico di su pais cu e ta prepara, sigur ta hopi gusta pa su famia y amistadnan. Algun aña pasa el a sali den revista FOCUS compartiendo algun di su recetanan preferi cu e lectornan. Parwien tin un yiu muher, Faryel Badloe (25), cu na augustus e aña aki ta finalisa su estudio como basisarts. Despues e lo sigui pa specialisa su mes pa bira un internista.  

Locual cu Parwien ta hayando mas falta di Aruba ta di su amistadnan y di e solo door cu aki nunca ta haci friu. Su bida na Hulanda memey di un pandemia e ta bisa: “Cosnan normal a caba, bay restaurant, concierto, movies, bishita mi mama. No mas biahe, esey ta hopi fastioso”.
E mester a siña anda diferente durante e crisis di coronavirus compara cu su bida di antes, unda e por a bay unicamente supermercado y botica. Mientras e tabata na cas e tabata haci ehercicio, wak Netflix, cana pafo y keda den contacto cu su famia y amigonan.

E ta siguiendo tur e guidelines cu gobierno ta recomenda pa haci den su adaptacion na e bida nobo. Ademas e ta ahusta mas tanto cu ta posibel na e ‘new normal’, y ta haya cu na Hulanda mayoria di hende ta adaptando basta bon. E mescos cu casi tur hende ta purba keda 1,5 meter di distancia y bisti mondkapjes den transporte publico. Su mensahe: “Mi ta spera cu tur hende keda sigur y sano. Hunto nos por y tin cu combati COVID-19”.

LEAVE A REPLY

Please enter your comment!
Please enter your name here