Cu e apertura bek di e salonnan di beyesa, Hair Factory a estrena su interior completamente remodela. E color blanco ta predomina den henter e decoracion moderno, cu e mueblenan traha na Medellin, Colombia. Henter e idea ta inicialmente di e propietario, Alex Tejada, cu for di october aña pasa a tuma contacto cu e fabricante pa e concepto di e diseño. Algun di e ideanan el a saca for di Pinterest, cu por adapta na e espacio y estilo final cu e tabata desea.
Manera aña a habri dia 2 di januari a cambia e tegels di e vloer y algun dia despues Alex a biaha pa Medellin, pa personalmente supervisa e prome mueblenan, cu nan tabatin cla traha. Net e momento cu tur e mueblenan tabata cla pa transporta pa Aruba, esaki mester a wanta door di coronavirus crisis. E situacion inespera cu a surgi a cambia e plan cu Alex tabatin pa instala e interior nobo. Sinembargo un siman prome cu nan por a habri e salon bek, e mueblenan a yega Aruba.
Den un siman Alex hunto cu su partner, Leoman Sanchez, a instala cada mueble y tur e spielnan den e salon. Nan a ricibi un cantidad di compliment for di e clientenan ora nan drenta e salon y tambe riba nan social media. E clientenan por experiencia con confortabel e sofa- y stulnan ta sinti ora di sinta pa tanto e parti di e tratamentonan di cabey y pronto tambe pa manicure y pedicure. E team di Hair Factory ta consisiti di: Ana Maduro, Julieth Acevedo, Leoman Sanchez, Alex Tejada y awor a join nan tambe Jesús Viroh.
