Ayera nochi Karena Maduro a ricibi un grato sorpresa ora el a yega y topa cu su circulo di amistad sperando riba dje na entrada di e hardin di Monastery Estate. For di tempran el a bisa su amiganan cu e ta bay sali pa celebra su cumpleaño, pero e no a sospecha cu ya su fiesta tabata bon planea. E momento cu e cumpleañera tabata seca e lagrimanan di emocion di e sorpresa ricibi, el a keda ainda mas impacta ora cu Jerrino Bass a cuminsa canta un serenata dedica special p’e. Despues nan a canta duo e cancion ‘No Me Ames’ di Marc Anthony y JLO. Karena ademas di modela ta gusta canta y karaoke ta un di su pasatemponan preferi. P’esey a prepara un set-up profesional di DJ Chris Semerel cu diferente screen pa entretene e invitadonan durante e anochi. E bunita decoracion den e tononan preto, blanco y rose gold a ser haci pa Orlando Arcaya, cu a haci tambe un presentacion estilo Beyonce, cu e toke extravangante cu Orly ta conoci den su shownan. Despues a sigui mas show sorpresa durante e break di Karaoke y tur hende a gosa di un anochi yen di entretenimento. Un station hopi gusta tabata di Funnel Cake Aruba, cu un variedad di fruta cu cada persona por a scoge, pa asina traha e bolo di nan gusto eynan mes. Manera tabata di spera cu Karena lo luci super bella y a ‘dress to impress’ den su shimis sequins rose gold. Un meta cu el a pone pa train y mantene un nutricion escrito pa luci e shimis aki dia e ta celebra su 43 aña di edad. Pabien Karena!
