Prinses Alexia, e yiu muhe di rey Willem-Alexander y reina Máxima, ta cumpli awe 15 aña di edad.
Het Koninklijk Huis riba nan Instagram a haci un post awe dedica na prinses Alexia. Riba e potret e prinses ta bisti den un shimis preto chic y cu un ‘makeup look’ minimaal. Entre e tres yiu muhenan di e reina, esun cu tin mas su parecido ta prinses Alexia. Su nomber completo ta: Alexia Juliana Marcela Laurentien, Prinses der Nederlanden, Prinses van Oranje-Nassau.
E luna aki e prinses a sali den noticia ora videonan di TikTok a wordo publica, unda hunto cu su amiganan nan ta interpretando letranan di e cantica ‘In The Party’ di Flo Milli. Door di e cantica su palabranan sexista y un tiki ‘rough’, el a causa discusion na Hulanda, y tambe a haya atencion di prensa internacional. Tabatin un discusion di e forma con e videonan a wordo publica. Si e tabata door di e prinses mes, of su amiganan. Esey no a wordo clarifica y Servicio di Informacion di Gobierno no a haci niun comentario tampoco tocante di e incidente.
