For di chikito Odillia tabata sa caba cu e kier bira un artista aunke niun miembro di su famia ta den e mundo di espectaculo. For di su 6 aña e tabata den baile pero ora e tabatin 13 aña algun cos a pasa den su bida, cu baile no tabata suficientemente creativo p’e. Esey tabata e momento cu el a cuminsa skirbi storia, despues el a cuminsa rima y tambe scucha Lil’ Kim y Biggie Smalls, y uza nan beats. Ora Odillia tabatin alrededor di 15 pa 16 aña el a cuminsa canta. El a atende Herman Brood Academie pa 3 aña pa despues bay Los Angeles pa sigui su soño. E prome tres simannan na L.A. e tabata nervioso y tabata manera cu esaki no ta bay traha of e mester bay bek Hulanda. Pero den e ultimo siman el a conoce su manager, kiermen ta great con tur cos a ‘work out’.
Prome cu Odillia a bay L.A. el a traha un aña riba un album y music video pa e no yega man bashi. Ora su manager a scucha su record el a haye asina ‘amazing’, cu e kier a traha cu ne. Nan a lansa un cantica cu Lilkeef na januari e aña aki, cu ta number 48 riba e top 100 rhythmic chart na Merca. E ta sinti ‘awesome’, specialmente cu esaki a pasa den un aña so. El a bay Merca na november 2019 y awo ta juli 2020, y hariendo e ta bisa cu e cosnan cu ta pasando ta ‘insane’. Su colaboracion cu Snoop Dogg cu e cantica ‘Break It Down’, a surgi a traves di su management y e ta hopi emociona cu e cantica. El a desea cu e tambe lo por ta aki awo, pero door di COVID-19 ta imposibel, e ta pega den L.A door di e lockdown. E ta bay graba na L.A. mes pa e ta den e music video.
Odillia su schedule den e tres dianan aki tabata hopi intenso, cu entre su pauze di grabacion e tabata bay entrevista na diferente emisora of television. Hunto cu su team cu a bin cu ne, e kier a duna e oportunidad tambe pa e hendenan di Aruba join nan. Odillia a gusta Aruba asina hopi cu e kier cumpra un cas y biba aki. E ta haya e hendenan asina agradabel, contento y agradecido. E ta haya falta di esaki door cu na Hulanda e hendenan ta mas riba nan mes. E ta haya aki e hendenan ta amazing, e localidadnan ta maraviyoso, semper tin solo y cu e paisahenan super bunita. E escogencia pa realisa e video na Aruba ta door cu aki e Americanonan ta bonbini ademas cu tin e paisahenan mas bunita y maraviyoso. Nan no ta kere cu tin un miho luga manera aki pa e cancion cu tin un vibe caribense.
